Украинчууд 2022 оны сүүлчийн болон 2023 оны эхний өдрийг Оросын армийн агаарын довтолгоо, бөмбөгдөлт дор өнгөрүүлжээ.
Аюулгүй байдлыг хангах үүднээс Украины эрх баригчид Бямба гарагийн оройн 7:00 цагаас шөнө дунд хүртэл орон даяар хөл хорионы цаг тогтоосон тул олон нийтийн газарт шинэ оныг угтах боломжгүй болсон байна.
Тус улсын зэвсэгт хүчин Ням гарагт мэдээлэхдээ сүүлийн 24 цагийн хугацаанд Оросын талаас 31 пуужин харваж, 12 агаарын довтолгоо зохион байгуулсан гэжээ.
Иранд үйлдвэрлэсэн Шахед дроны нийт 45 удаагийн довтолгоог таслан зогсоосны 13 нь Бямба гарагт, 32 нь Ням гарагт болсон байна.
Энэ удаа цэрэг, дэд бүтцийн байгууламжуудаас гадна иргэдийн орон сууц, автомашины зогсоол, тоглоомын талбай зэрэг газруудад агаарын цохилт өгснийг Киевийн эрх баригчид мэдээлжээ.
Киев хотод унасан нэг дроны бөөрөн дээр гараар “Шинэ оны мэнд” гэж орос хэлээр бичсэн байсныг тус хотын цагдаагийн газрын дарга Андрей Небытов сошиал хуудсандаа харуулсан байна.
Украины ерөнхийлөгч Володимир Зеленский шинэ оны мэндчилгээнийхээ үеэр Оросын ард иргэдэд шууд хаягласан үг хэлжээ. “Террорист улсыг хэзээ ч өршөөдөггүй. Ийм халдлагыг тушаасан болон гүйцэтгэсэн хэн ч зүгээр өнгөрөхгүй” гэж хэлсэн Зеленский орос хэлээр “Орос улс НАТО-тай дайтаагүй, энэ бол танай худал суртал нэвтрүүлэг. Энэ дайн бол үлдсэн амьдралдаа эрх мэдэлтэй үлдэх гэсэн нэгний санаачилсан зүйл” гэж мэдэгдсэн байна.
Тэрбээр ОХУ-ын ерөнхийлөгч Владимир Путинийг “Армийнхаа ард, пуужингуудын ард, ордныхоо хананы ард, та бүхний ард нуугдаад танай улсыг ирээдүйтэй нь хамт шатааж байна” гэж шүүмжилжээ.
Харин Путин шинэ жилийн мэндчилгээндээ Орос цэргүүд “эх орноо хамгаалахын төлөө” Украинд байлдаж байгааг онцолсон байна.
“Өнөөдөр бид өөрийн ард түмэн, түүхэн газар нутаг, Оросын Холбооны бүрэлдэхүүнд орсон шинэ бүс нутгуудыг хамгаалахын төлөө дайтаж байгаа юм” гэж Путин энэ үеэр хэлжээ.
“Ёс суртахуун, түүхэн үнэн бидний талд байна” гэж тэр бас хэлсэн юм.
Шинэ жилийн үдэш нийслэл Москва хотод уламжлалт баяр ёслолын ажиллагаа бололгүй, нам гүм өнгөрсөн байна. Цар тахлын хорио цээрийн дэглэм мөрдөгдөж буй шалтгаанаар Улаан талбайг хааж, ойролцоох гудамжнуудад цагдаагийн хамгаалалтыг нэмэгдүүлжээ.
Эх сурвалж: Reuters, Associated Press