Өнгөрсөн долоо хоногт Украины Бахмутын ойролцоо тулалдаж буй Оросын Вагнер группийн хөлсний цэргүүдийн видео мэдэгдэл сошиал орчинд тарсан юм.

Уг мэдэгдэлдээ тэд арын хангамжийг нь тасалдуулж буй ОХУ-ын зэвсэгт хүчний жанжин штабын дарга, генерал Валерий Герасимовыг элдвээр хараан зүхэж байжээ.

“Жанжин штабын дарга чи бол новшийн амьтан. Бидэнд тулалдахад хэрэгтэй юу ч алга, сум ч алга. Бидний төлөө залуус алагдаж байхад бид энд юу ч хийж чадахгүй сууж байна. Бахмутын дэргэд бид Украины бүтэн армийн эсрэг тулалдаж байгаа. Та нар хаана байна? Туслах цаг чинь болсон. Та нарыг новшийн амьтад гэж нэрлэхээс өөр үг олдохгүй нь” гэж Вагнерын цэргүүдийн нэг ярьсан юм.

Оросын суртал нэвтрүүлэгчид, блоггерууд үүнийг Украины үндсэрхэг үзэлтнүүдийн тараасан хуурамч бичлэг байж болзошгүй гэж тайлбарлаж байв.

Харин маргааш нь Вагнер Группийн тэргүүн Евгений Пригожин бичлэг бодитой болохыг баталжээ.

Тэрбээр өөрийн группийн албан ёсны Телеграм сувагт өгсөн тодруулгадаа “Тэр муухай бичлэгт Украины үндсэрхэг үзэлтнүүд байгаагүй. Залуус надад энэ бичлэгийг өгсөн юм. Дулаан өрөөнд суугаа хүмүүст фронтын шугамд тулгарч буй асуудлуудыг сонсох хэцүү байх. Гэхдээ найз нөхдийнхөө цогцсыг өдөр бүр чирч, өдөр бүр тэднийгээ сүүлчийн удаа харж буй үед арын хангамж маш их чухал байдаг. Харамсалтай нь алхам бүрд асуудал тулгарч байхад бид тэдгээрийг хүчээр ч хамаагүй шийдвэрлэхээс өөр арга алга” гэж Пригожин ярьсан байна.

Эндээс Оросын зэвсэгт хүчин болон хувийн Вагнер Группийн хоорондын зөрчил гүнзгийрсэн нь харагдаж байгаа юм.

Кремлийн хүндэтгэлийн зоогуудыг зохион байгуулдаг онцгой эрхтэй байсныхаа төлөө “Путиний тогооч” хэмээх хочтой болсон Пригожины нөлөө Украины дайны 11 сарын хугацаанд үлэмж хэмжээгээр нэмэгдээд байна.

Тэрбээр Крымийн хойгийг ОХУ-д нэгтгэж, Донбассын бүс нутагт салан тусгаарлах дайн эхэлсэн 2014 онд хувийн батлан хамгаалах салбарын Вагнер Группийг үүсгэн байгуулсан юм.

Одоо тус группийн хөлсний цэргүүд хилийн чанадад Кремлийн эрх ашгийг хамгаалах ажиллагаануудыг зохион байгуулдаг. Тухайлбал тэд Сири, Мали, Төв Африкийн Бүгд Найрамдах Улс, Ливид үүрэг гүйцэтгэж байна.

Оросын үндсэн арми Өрнөдийн зэр зэвсгээр тоноглогдсон Украины армийн эсрэг тулаанд хүчин мөхөстөж буй энэ үед Путиний гол тулах цэг Вагнер Групп болсон гэх мэдээлэл бий.

Гэхдээ Вагнерын дайчдыг сүм хэрэгслээр хангах ажлыг Кремлийн эрх баригчид хариуцаж байгаа юм. Умард Солонгосын илгээсэн сум хэрэгслийг Вагнер Групп хүлээж авсан тухай Цагаан ордны үндэсний аюулгүй байдлын зөвлөлийн хэвлэлийн төлөөлөгч Жон Кирби өнгөрсөн сарын 22-ны өдөр мэдээлж байв.

Эх сурвалж: Radio Free Europe, Business Insider