ОХУ-ын ерөнхийлөгч Владимир Путин өчигдөр Үнэн алдартны шашны зул сарын баярыг тохиолдуулан Украины фронт дээр 36 цагийн хугацаатай гал зогсоох тушаал өгчээ.
Гал зогсоох хугацаа Москвагийн цагаар Баасан гарагийн шөнө дундаас эхлэх юм байна.
Кремлийн эрх баригчид адил арга хэмжээ авахыг Украины талд уриалсан ч Киевийн засгийн газар хүлээж аваагүй юм.
Украины ерөнхийлөгч Володимир Зеленский өөрийнх нь армийн довтолгоог саатуулах зорилгоор “гал зогсоох гэж байна” хэмээн тайлбарлажээ.
Кремлийн ордноос гаргасан мэдэгдэлд гал зогсоох нь байлдааны ажиллагаагаа сулруулах зорилгогүй, зөвхөн Оросын үнэн алдартны сүм хийдийн захиргаанаас гаргасан хүсэлтийг дагасан хэрэг гэж тайлбарласан байна.
Путинийг тушаал өгөхөөс өмнө Оросын үнэн алдартны сүм хийдийн тэргүүн Кирилл зул сарын баярыг тохиолдуулан сүсэгтнүүдэд мөргөл үйлдэх боломж гаргахыг уриалж байсан юм.
Юлийн цаг тооллыг дагадаг загалмайн шашны үнэн алдартны урсгалынхан нэгдүгээр сарын 7-нд Есүс Христийн мэндэлсэн өдөр буюу зул сарын баярыг тэмдэглэдэг уламжлалтай.
“Хамба лам Кириллийн хүсэлтийг харгалзан ерөнхийлөгч ОХУ-ын батлан хамгаалахын сайдад Украины нутаг дэвсгэрт 36 цагийн турш гал зогсоохыг даалгалаа” гэж Кремлийн мэдэгдэлд өгүүлжээ.
Харин өчигдөр орой хийсэн ээлжит мэдэгдэлдээ Украины ерөнхийлөгч Володимир Зеленский гал зогсоох санаачилга нь Донбасс дахь армийнх нь довтолгоог саатуулж, өөрийн хүн хүч, зэвсэг техникийг зузаатгах гэсэн оролдлого гэж үзэж байгаагаа мэдэгдсэн байна.
АНУ-ын ерөнхийлөгч Жо Байден гал зогсоох саналыг Путиний “нэмэлт хүчилтөрөгч олж авах гэсэн оролдлого” төдий зүйл гэж үзэж байгаагаа илэрхийлжээ.
Украины ерөнхийлөгчийн зөвлөх Михайло Подоляк эзлэгдсэн газар нутгаас нь Оросын цэрэг гарч дуусах хүртэл ямар ч гал зогсоох арга хэмжээ байх ёсгүйг хэлсэн байна.
Тэрбээр үүнийг Оросын тал өөрийгөө гадаад ертөнцөд хүмүүнлэг мэт харагдуулах, Украиныг аюул занал гэж харагдуулах гэсэн “суртал нэвтрүүлэг” гэж нэрлэжээ.
Оросын үнэн алдартнуудтай ижил дэг ёсыг дагадаг байсан Украины сүм хийдүүдийн ихэнх нь сая Зул сарын баярыг католик сүм хийдийнхний уламжлалаар арван хоёрдугаар сарын 25-нд тэмдэглэж, эзлэн түрэмгийлэгчдээс өөрийгөө ялгаруулах болсон юм.
Эх сурвалж: BBC
