Шведийн төрийн өмчит уул уурхайн компани LKAB тус улсын алс умард хязгаарт нэг сая гаруй тонны нөөцтэй газрын ховор элементийн орд илрүүлснээ өчигдөр зарлажээ.
Энэ бол Европ тивээс илэрч байсан ийм төрлийн түүхий эдийн хамгийн том орд юм.
Газрын ховор элемент нь цахилгаан автомашин, салхин сэнсний турбин, зөөврийн электроник, микрофон, чанга яригч зэрэг орчин үеийн өндөр технологийн бүтээгдэхүүнүүдийн чухал түүхий эд болдог.
“Энэ бол зөвхөн LKAB компанид биш, бүс нутаг, Шведийн ард түмэн, нийт Европ тив, дэлхийн уур амьсгалд ч сайн мэдээ юм” гэж LKAB компанийн гүйцэтгэх захирал Ян Мостром мэдэгджээ.
Одоогоор газрын ховор элементийг Европ тивд огт олборлодоггүй, импортоос бүрэн хамааралтай байдаг.
“Цахилгаанжуулалт, Европын бие даасан байдал, Орос, Хятадаас үл хамаарал одоо эхэлж байна” гэж Шведийн Эрчим хүч, Бизнес, Аж үйлдвэрийн сайд Эбба Буш мэдэгджээ.
Европын Холбоо газрын ховор элементийг тус тивийн хувьд хамгийн чухал түүхий эдийн нэг гэж үздэг ч ихэнх хэсгээ Хятадаас импортолдог юм.
Гэхдээ олборлолт эхлэхэд нэлээд хугацаа орохоор байна. LKAB олборлож эхлэх хүсэлтээ энэ онд багтаан гаргах бол бүтээгдэхүүнээ зах зээлд гаргаж эхлэх хугацааг 10-15 жилийн дараа гэж тооцоолжээ.
Эх сурвалж: Reuters