МОСКВА. /Forbes/. “Forbes” сэтгүүл 2022 онд хөрөнгө нь хамгийн их хэмжээгээр нэмэгдсэн ОХУ-ын 10 тэрбумтны жагсаалтыг гаргажээ. Уг жагсаалтыг эрдэст бордоо үйлдвэрлэгч компаниудын нэгдэл болох "Акрон” группийн хяналтын багц хувьцаа эзэмшигч Вячеслав Кантор тэргүүлсэн байна. “Forbes” сэтгүүлийн тооцоолсноор, өнгөрсөн онд Канторын хөрөнгө 5.3 тэрбум ам.доллароор нэмэгджээ. Оросын бордоо үйлдвэрлэгчдийн хувьцаа өнгөрсөн онд Москвагийн бирж дээр үнэ нь өссөн цөөн хэдэн үнэт цааснуудын нэг байсныг “Forbes” онцолсон байна.

Жагсаалтын хоёрдугаарт, өнгөрсөн онд хөрөнгө нь 4.2 тэрбум ам.доллароор нэмэгдэж, 11.5 тэрбум ам.доллар болсон "Фосагро" холдингийн захирлуудын зөвлөлийн гишүүн асан Андрей Гурьев болон түүний гэр бүл бичигджээ. Хөрөнгө оруулалтын “DST Global” сангийн эзэн Юрий Мильнер гуравдугаарт эрэмблэгдсэн байна. Өнгөрсөн оны 10 дугаар сард ОХУ-ын иргэншлээс татгалзаж буйгаа мэдэгдсэн түүний хөрөнгө 2.5 ам.доллароор нэмэгдэж, 7.3 тэрбум ам.доллар болжээ.

Өнгөрсөн онд хамгийн их “баяжсан” Оросын 10 бизнес эрхлэгчийн жагсаалтад мөн Мөн "Еврохим" компанийг үүсгэн байгуулагч Андрей Мельниченко (хөрөнгө нь 2.1 тэрбум ам.доллароор нэмэгдэж, 27.5 тэрбум ам.доллар болсон), "ВСМПО-Ависма" корпорацын захирлуудын зөвлөлийн орлогч дарга Михаил Шелков (+1.6 тэрбум ам.доллар, 5.8 тэрбум ам.доллар), "Норебо" загас агнуурын холдингийн эзэн Виталий Орлов (+0.89 тэрбум ам.доллар, 1.9 тэрбум ам.доллар), эрчим хүч, тээвэр, аж үйлдвэрийн тэргүүлэгч компаниудад зориулж металл бүтээгдэхүүн үйлдвэрлэгч Оросын томоохон компаниудын нэг болох ОМК-ийн захирлуудын зөвлөлийн дарга Анатолий Седых (+0.5 тэрбум ам.доллар, 1.8 тэрбум ам.доллар), "Протек" эмийн холдингийн эзэн Вадим Якунин (+0.49 тэрбум ам.доллар, 1.5 тэрбум ам.доллар), "М.Видео-Эльдорадо" группийн хувьцаа эзэмшигч Саид Гуцериев (+0.4 тэрбум ам.доллар, 1.7 тэрбум ам.доллар) нар багтсан байна.

Д.Жаргал

Эх сурвалж: "Монцамэ" агентлаг