КИЕВ. /Xinhua/. Украины энхийн төлөвлөгөөний талаар хэлэлцэх дээд хэмжээний уулзалт хоёрдугаар сарын 24-ны өдөр болж магадгүй гэж Украинаас Туркт суугаа Элчин сайд Василий Боднар мэдээлснийг “Ukrinform” агентлаг пүрэв гарагт уламжилжээ.
НҮБ-ын Ерөнхий нарийн бичгийн дарга Антонио Гутерришийн зуучлалаар явуулах дээд хэмжээний уулзалт АНУ-ын Нью-Йорк хот дахь НҮБ-ын төв байранд болох төлөвтэй байна гэж тэрбээр ярьсан байна.
Мөн В.Боднар Украинд энх тайвныг тогтоохоор Киевийн санаачилсан төлөвлөгөөг дэмжиж, түүнийг хэрэгжүүлэхэд дэмжлэг үзүүлэхэд бэлэн байгаагаа илэрхийлсэн Туркийн талд талархал илэрхийлжээ. Украины Ерөнхийлөгч Владимир Зеленский Индонезийн Бали аралд өнгөрсөн 11 дүгээр сард болсон “Хорийн бүлэг”-ийн дээд хэмжээний уулзалтын үеэр Орос-Украины дайныг зогсоох 10 зүйл бүхий энхийн төлөвлөгөөг дэвшүүлсэн юм.
Э.Хулан
Эх сурвалж: "Монцамэ" агентлаг
