Бямба гарагт Оросын арми Украины хотуудад агаарын цохилт өгөх үеэр Днипро хотын орон сууцны нэг барилга пуужинд оногдож энгийн номхон 25 хүн амь үрэгдсэн нь өчигдрийн байдлаар тогтоогджээ.
Ням гарагийн үдээс хойш Украины иргэний хамгааллын газраас өгсөн мэдээллээр нийт 73 хүн шархадсаны 13 нь хүүхэд байсан байна.
Амь үрэгдсэн нь тогтоогдоод буй 25 хүний нэг нь бас хүүхэд байжээ.
Одоогоор 43 хүн сураггүй байгаа тул хохирлын хэмжээ нэмэгдэх нь тодорхой болоод байна.
Есөн давхар нийтийн орон сууцны нурангид дарагдсан хүмүүсийг аврах ажиллагаа үргэлжилж байна. Өнгөрсөн хугацаанд нурангид дарагдсан 39 хүнийг аварчээ.
Украины төв бүсийн Днипро хотын захирагч Борис Филатов “Дарагдсан хүмүүсийн амьд гарах магадлал маш бага байна. Амь үрэгдсэн хүний тоо өсөх нь тодорхой боллоо” гэж ярьсан байна.
Бямба гарагт Украины олон хотод гарсан агаарын халдлагуудаас хамгийн их хохирол амссан нь Днипро хот болжээ.
Энэ өдөр Украин даяар 26 хүн алагдаж, 80 гаруй хүн шархадсан байна. Өмнөд бүсийн Одесса, зүүн бүсийн Харьков, баруун бүсийн Львовоос гадна нийслэл Киев хот агаарын довтолгоонд өртсөн юм.
Киевийн эрх баригчид Оросын армийн агаарын цохилтыг “террорист ажиллагаа” гэж нэрлэжээ.
Оросын талаас харвасан 38 пуужингийн 25-ыг устгаж чадсанаа Украины зэвсэгт хүчин мэдээлсэн юм.
ОХУ-ын батлан хамгаалах яам Бямба гарагийн цохилтын талаар өчигдөр мэдэгдэхдээ “Төлөвлөгдсөн бүх байд цохилт өгч чадлаа” гэжээ.
Нэгдүгээр сарын 20-ны өдөр Германы Рамштайны агаарын баазад Украиныг дэмжигч холбоотон орнуудын батлан хамгаалахын сайд нар чуулах гэж байна.
Энэ үеэр холбоотнууд Украинд үзүүлэх зэр зэвсгийн тусламжаа нэмэгдүүлэх талаар хэлэлцэх юм. Одоогоор Их Британи улс Өрнөдөд үйлдвэрлэсэн танкуудыг Украинд илгээх шийдвэрээ урьдчилж зарлаад байна.
Үүнээс гадна Польш, Финланд улсууд Германд үйлдвэрлэсэн Leopard 2 танкуудыг илгээхээр бэлдэж буй тухай мэдээлэл ирж байгаа.
Өчигдөр Берлинд суугаа Украины элчин сайд Олексий Макейев тус улсад Leopard 2 байлдааны танкуудаа илгээхийг Германы эрх баригчдаас уриалжээ.
“Герман зэвсэг, Герман танкууд бидэнд амин чухал хэрэгцээтэй байна. Бидэнд ярилцах цаг бага үлдлээ. Холбоотнууд маань үүнийг ойлгож, яаралтай шийдвэр гаргана гэдэгт бид найдаж байна” гэж тэр хэлсэн байна.
Эх сурвалж: DPA
