Афганистаны парламентын гишүүн асан эмэгтэй Ням гарагийн шөнө Кабул хот дахь гэртээ нэг бие хамгаалагчийн хамт буудуулж алагджээ.
32 настай Мурсал Набизада нь 2021 оны наймдугаар сард Талибаны дэглэм засгийн эрхийг авахаас өмнө Афганистаны парламентын гишүүн байсан юм.
Набизадагийн гэрт гарсан зэвсэгт халдлагын мөрөөр шалгаж эхэлснээ Кабул хотын цагдаагийн газар өчигдөр мэдээлжээ.
“Набизада бол Афганистаны баатарлаг эмэгтэйчүүдийн төлөөлөл байсан юм. Тэрбээр итгэл үнэмшлийнхээ төлөө тууштай тэмцэгч нэгэн байв. Афганистанаас явах боломж байсан ч тэр ард түмнийхээ төлөө тэмцэхээр үлдсэн юм” гэж түүнтэй хамт нэг парламентад ажиллаж байсан Мариам Солайманхил твиттер хуудсандаа бичсэн байна.
Набизада нь Афганистаны зүүн бүсийн Нангархар мужаас 2018 онд парламентад сонгогдож байжээ.
АНУ-ын цэрэг байрлаж байсан 20 орчим жилийн хугацаанд Афганистанд эмэгтэйчүүд хариуцлагатай, өндөр албан тушаал хашдаг болсон юм.
Харин Талибанчууд засгийн эрхийг авснаас хойш эмэгтэйчүүдийн ажил хөдөлмөр эрхлэх боломж улам багасаад байгаа.
Тухайлбал дунд болон дээд сургуульд суралцах, төрийн байгууллагад ажиллахыг хориглосноос гадна олон нийтийн зарим байгууламжид зорчихыг хориглож, бүх биеэ халхалсан битүү хувцас өмсөхийг шаарддаг болоод байна.
Эх сурвалж: AFP