Өнгөрсөн онд Хятад улсын хүн ам сүүлийн 60 гаруй жилийн хугацаанд анх удаагаа хорогдсоныг албаны тоо баримт харуулжээ.
2022 онд тус улсын хүн ам 1.4118 тэрбумд хүрсэн нь 2021 оныхоос 850,000-аар буурсан үзүүлэлт болсон байна.
Сүүлийн жилүүдэд Хятадад хүүхдийн төрөлт буурч, өндөр настны хүн амд эзлэх хувь байнга нэмэгдэж байгаа.
Долоон жилийн өмнө эрх баригчид үүнийг зогсоохын тулд айл өрх бүр “нэг хүүхэд”-тэй байх бодлогоо цуцалж байв.
Гэсэн ч үр дүн гараагүй нь өчигдрийн тоо баримтаас харагдаж байна.
2021 онд 1,000 хүн тутамд 7.52 төрөлт оногдож байсан бол 2022 онд 6.77 төрөлт болж буурсныг Хятадын статистикийн үндэсний хорооноос өчигдөр гаргасан тоо баримт харуулжээ.
Харьцуулбал 2022 онд АНУ-д 1,000 хүн тутамд 11.06, Их Британид 10.08 төрөлт оногдож байсан байна.
Хүн амын тоогоор удахгүй Хятадыг гүйцэж, дэлхийд тэргүүлэх гэж байгаа Энэтхэг улсад энэ тоо өнгөрсөн онд 16.42 байжээ.
Өнгөрсөн онд Хятадад анх удаагаа шинэ төрөлтийн тооноос нас баралтын тоо давсан байна.
Нас баралтын хувь хэмжээ 1976 оноос хойших хамгийн өндөр түвшинд буюу 1,000 хүн тутамд 7.37 болж нэмэгджээ.
2021 онд энэ хэмжээ 7.18 байсан юм.
2023 онд нас баралтын хувь хэмжээ цар тахлын улмаас улам нэмэгдэх төлөвтэйг зарим судлаачид анхааруулсан байна.
Хятад улс хүн амын хэт өсөлтөө хязгаарлахын тулд 1979 онд “нэг хүүхэд” бодлогыг нэвтрүүлж байсан түүхтэй.
Харин 2016 онд энэ бодлогоосоо татгалзаж, айл өрх бүрд хоёр хүүхэдтэй байхыг зөвшөөрөх болсон юм.
Үүнээс гадна хүүхэд төрүүлэхийг дэмжсэн олон төрлийн арга хэмжээ авсан ч үр дүн муу байна.
2022 оны аравдугаар сард болсон Хятадын Коммунист Намын их хурлаар ерөнхийлөгч Ши Жиньпин хүн амын өсөлтийг тэргүүн зорилт болгон зарласан юм.
Эх сурвалж: BBC
