Украинд хөлсний цэргүүд нь байлдаж байгаа батлан хамгаалах салбарын хувийн компани Вагнер Группийн командлагч асан Андрей Медведев саяхан Норвеги улс руу дүрвэж, улс төрийн орогнол хүссэн байна.
2022 оны долдугаар сарын 6-нд анх шоронгоос Вагнерт элсэж байсан тэрбээр Норвегийн хилийг давж, тус улсын цагдаагийн газарт саатуулагдаад байгаагаа gulagu.net хүний эрхийг хамгаалах байгууллагын сайтад мэдээлжээ.
Бүтэн өнчин өссөн Медведев цэргийн алба хааснаасаа хойш хэд хэдэн удаа шоронд орсны дараа Вагнерт элсэж байсан гэнэ.
Гэвч тэр оргосон хөлсний цэргүүдийг хэрхэн алж устгаж байгааг нүдээр харсныхаа дараа өөрөө ингэж үхэхгүйн тулд Вагнераас зугтжээ.
Норвегийн цагдаагийн газар Пүрэвээс Баасан гарагт шилжих шөнө умард туйлын нутагт оршдог хилийн шугамыг Оросын талаас нэг хүн давж ирснийг мэдээлсэн байна.
Норвегийн өмгөөлөгч нь Медведевийг нийслэл Осло хотын ойролцоо хоригдож байгааг мэдээлжээ.
Вагнер Группийн босс Евгений Пригожин оргосон командлагчийнхаа талаар “тэр манай Норвегийн нэгжид ажиллаж байсан. Олзны хүмүүстэй зүй бус харьцдагаараа танигдсан нэгэн байв” гэж ярьсан байна.
“Болгоомжтой байгаарай. Тэр маш аюултай хүн” гэж Пригожин анхааруулжээ.
Медведев сайтад өгсөн ярилцлагадаа Вагнер Групп түүний саналыг сонсолгүйгээр алба хаах хугацааг нь дахин дахин сунгаж байсан нь урвах шалтгаан болсон гэнэ. Тэр бас Вагнерынхан оргоод баригдсан хоригдлуудыг хэрхэн харгисаар гэсгээн цээрлүүлдэг байсныг нүдээр харснаа ярьжээ.
Медведевийн хэлснээр Оросын шоронгоос хоригдлуудыг дайчилж эхэлсэн 2022 оны хоёрдугаар хагасаас хойш Вагнерын хүн хүчний хохирлын хэмжээ эрс нэмэгдсэн гэнэ.
Арваннэгдүгээр сард Вагнер Группийнхэн оргосон нэг хоригдлын толгойг лантуугаар бяц цохин цаазалж, дүрс бичлэгийг нь цацаж байсан юм. Цаазлуулсан хоригдол өөртэй нь цуг алба хааж байсныг Медведев ярьжээ.
Эх сурвалж: Reuters
