Хөгжлийн банкны зээлтэй холбоотой УИХ-ын Хянан шалгах түр хорооны сонсгол хоёр дахь өдрөө үргэлжилж байна. "Шарын гол" ХК-ийн Хүүшийн амны алтны шороон ордыг ашиглах төслийн зээлийн зарцуулалтыг холбогдох шинжээч танилцуулж байна.
"Шарын гол" ХК нь Дархан-Уул аймгийн Шарын гол суманд байрших "Буянтын хөндийн адаг" алтны шороон ордыг ашиглах төслийн хүрээнд техник худалдан авах, эргэлтийн хөрөнгө болон алтны ордны нөөцийг нэмэгдүүлэх ажлын санхүүжилтэд нийт 264 сая иений зээлийг авсан. Тус компанийн хөрөнгийн биржд бүртгэлтэй нээлттэй хувьцаат компани бөгөөд зээл авах үеийн байдлаар 1040 хувьцаа эзэмшигчээс нийт хувьцааны 5 хувиас дээш хувьцаа эзэмшигч 6 хүн байсан. Зээлийг гэрээг иенээр олгохоор гэрээ байгуулсан. Санхүүжилтийг 100 хувь олгосон. 2022 оны 12 сарын 31-ний байдлаар зээлийг бүрэн төлж хаасан. 2018 оны 7 сард Хөгжлийн банкны эрсдэлийн удирдлагын газраас алдагдалтай ажилладаг, тоног төхөөрөмж худалдан авах гэрээ хийгдээгүй, зээлээ хугацаандаа төлж чадахгүй гэх үндэслэлээр уг төслийг санхүүжүүлэх нь эрсдэлтэй гэж үзсэн боловч зээл олгогдсон. Гэвч зээлийн удирдлагын хорооны 2018 оны 7 сарын 26-нд уг төсөлд зээл олгохыг дэмжсэн байна. "Шарын гол" ХК нь зээлийн санхүүжилтээс 4 тэрбумыг Хэрлэн Онон туул банк санхүүгийн байгууллагад шилжүүлж зориулалтын бусаар ашигласан. "Шарын гол" ХК-ийн захирал асан, ТУЗ-ийн гишүүн Б.Батбаатар нь "Хэрлэн Онон туул" Банк санхүүгийн байгууллагын хувьцааг эзэмшдэг" гэв.
Хянан шалгах түр хорооны дарга Б.ЭНХБАЯР:
-Голлож асуугдах гурван хүн ирсэнгүй. "Шарын гол" ХК-ийн үүсгэн байгуулагч, хувьцаа эзэмшигч гүйцэтгэх удирдлагын хамаарлыг харуулмаар байна. ТУЗ-ийн дарга Г.Хулан. Хулан нь Тагнуулын Ерөнхий газрын даргаар ажиллаж байсан Д.Гэрэлийн охин. Өөрөөр хэлбэл улс төрд нөлөө бүхий этгээдийн хамааралтай гэсэн үг. ТУЗ-ийн гишүүн Б.Батбаатар, гүйцэтгэх захирал Ж.Эрдэмбилэг нарын хамаарал бүхий компаниудыг цааш нь хөөнө. Батбаатар нь МНВ кредит компанийн эцсийн өмчлөгч. Б.Батбаатар нь Хэрлэн Онон туул банк санхүүгийн байгууллагын 100 хувийн хувьцаа эзэмшигч. Ж.Эрдэмбилэг нь "Шарын гол" ХК-ийн ТУЗ-ийн гишүүнээр ажиллаж байсан. Ж.Эрдэмбилэг нь "Говь карава" ХХК -ийн гүйцэтгэх захирал. 100 хувь эзэмшдэг. "Шарын гол" ХК нь зээлийн санхүүжилтээс 4 тэрбумыг Хэрлэн Онон туул банк санхүүгийн байгууллагад шилжүүлж зориулалтын бусаар ашигласан шинжээчийн дүгнэлт гарсан.
Хөгжлийн банкнаас "Шарын гол" ХК-ийн ..... тоот дансанд 3.5 тэрбум төгрөгийг 2018 оны 8 сарын 13-нд зээлийн гэрээнд заасны дагуу маргааш нь "Говь карава" ХХК-иас тоног төхөөрөмж худалдан авах гэрээг үндэслэн "Говь карава" ХХК-ийн ... тоот дансанд 540 сая төгрөгийг хийсэн.
Нийт дүнгээрээ 2018 оны 8 сарын 13-14 нд Хөгжлийн банкнаас "Говь карава" ХХК-руу 4 тэрбумыг шилжүүлсэн. Маргааш нь "Говь карава" ХХК нь "Хэрлэн Онон туул" БСБ-аас 470 сая төгрөгийг 3 удаагийн гүйлгээгээр хүлээн авч "Шарын гол" ХК-ийн дансанд нийтдээ 993 сая төгрөгийг хоорондын тооцоогоор гэсэн гүйлгээний утга бүхий хоёр удаагийн гүйлгээгээр шилжүүлсэн.
2019 оны 8 сарын 16-нд "Шарын гол" ХК нь Хөгжлийн банк болон "Говь карава" ХХК-иас шилжүүлсэн 4 тэрбум болон тус харилцах дансанд байршиж байсан үлдэгдэлийн хамт 9.5 тэрбумыг зээлийн эргэн төлөлт гэсэн утгатайгаар "Хэрлэн Онон туул" БСБ-руу шилжүүлсэн. БСБ-руу Хөгжлийн банкны мөнгө орчихоор нухацтай авч үзэх шаардлага гарч байна. Энэ нь мөнгө угаалтын хамгийн түгээмэл шинж учраас чухалчилж авч үзнэ. Хамаарал бүхий этгээдүүдийн харилцан хамааралтайг ийнхүү нотолж байна.
Э.СОСОРБУРАМ
Эх сурвалж: Time.mn