Макаогийн мөрийтэй тоглоомын хаан гэгддэг Алвин Чау зохион байгуулалттай гэмт хэрэг, хууль бус бооцоот тоглоом зэрэг нийт 100 гаруй зүйл ангиар 18 жилийн хорих ял сонссон байна.

48 настай Чаугийн хуульд зөвшөөрөгдсөн хэмжээнээс хэтрүүлсэн нийт бооцооны дүнг 823.7 тэрбум хонконг доллар буюу $105 тэрбум гэж дүгнэжээ.

Португалийн колони байсан Макао нь казиног хуулиар зөвшөөрдөг Хятадын цорын ганц хот юм.

Чау нь тус хотод үйл ажиллагаа явуулдаг Suncity Group-ийн үүсгэн байгуулагч, ерөнхийлөгч байжээ. Тус компани баян чинээлэг үйлчлүүлэгчдийг казино тоглуулах аялал зохион байгуулдаг Макаогийн хамгийн том оператор юм.

Тухайлбал Хятадын эх газраас тоглогчдыг Макаод авчрах, мөнгө зээлэх зэрэг бүх үйлчилгээг үзүүлдэг байна.

Бас Макаогийн казинонуудад VIP өрөөнүүд ажиллуулж, казинонуудын өрийг барагдуулах ажлыг хийдэг байжээ.

Чау 2021 оны арванхоёрдугаар сард баривчлагдаж байсан юм.

Прокурорууд түүнийг хууль бус бооцоот тоглоомоос олсон ашгаасаа 8.26 тэрбум хонконг долларын татвар төлөөгүйг шалгаж тогтоожээ.

Чаугийн хэрэгт холбоотой өөр 20 хүнийг бас ялласан байна.

Цар тахал Макаогийн казиногийн бизнест хүнд цохилт болсон юм. Үүнээс гадна сүүлийн жилүүдэд Хятадын засгийн газар казиногийн бизнест хатуу зохицуулалт хийх болсон.

Өнгөрсөн есдүгээр сард Хятадын зүүн бүсийн Вэньжоу хотын шүүх Чаугийн хэрэгтэй холбогдуулан хил дамнасан бооцоот тоглоомын хэргээр 30 гаруй хүнд ял оноосон юм.

Ганган дэгжин Чау хятад хэлтэй улс орнуудад маш их алдартай нэгэн бөгөөд түүний янз бүрийн бүсгүйчүүдтэй холбогдсон тухай дуулиан хэвлэлүүдээр байнга нийтлэгддэг байжээ.

Эх сурвалж: BBC