Туркменистаны экс ерөнхийлөгч Гурбангулы Бердымухамедов улсынхаа хууль тогтоох дээд байгууллагын дарга болсноос гадна “үндэсний удирдагч” цолтой болжээ.
Бямба гарагт Туркменистан улс хоёр танхимтай парламентын системээ нэг танхимтай болгон өөрчилж, парламентаас тусдаа Ард Түмний Зөвлөл нэртэй хууль тогтоох дээд байгууллагыг бий болгосон юм.
Төрийн шинэ институцийн даргаар аавыгаа томилох зарлигийг Туркменистаны одоогийн ерөнхийлөгч Сердар Бердымухамедов тухайн өдөр бас гаргажээ.
Өнгөрсөн оны гуравдугаар сард Гурбангулы Бердымухамедов 2006 оноос хойш хашсан ерөнхийлөгчийн албан тушаалаа хүү Сердардаа шилжүүлсэн юм.
Бямба гарагт бас ерөнхийлөгчийн өөр нэг зарлиг гарч, экс ерөнхийлөгчийг “Туркмений ард түмний үндэсний удирдагч” цолтой болгожээ.
Ард Түмний Зөвлөлийн гишүүдийг бүх нийтийн сонгуулиар сонгохгүй бөгөөд зөвхөн Бердымухамедовын үзэмжээр томилох юм байна.
Тус зөвлөл нь Туркменистаны төрийн эрх барих дээд байгууллага байх бөгөөд үндсэн хуулийг өөрчилдөг, дотоод болон гадаад бодлогыг тодорхойлдог байх гэнэ.
2020 оны есдүгээр сард Гурбангулы Бердымухамедов нэг танхимтай парламентаа хоёр танхимтай болгон өөрчилж, өөрийгөө дээд танхимынх нь даргаар томилж байжээ. Үндсэн хуульд нь ерөнхийлөгч хүн албан тушаал давхар хашихыг хориглодог ч тэр ийм шийдвэр гаргаж байв.
Сүүлийн өөрчлөлтийг Бердымухамедовын эрх мэдлээ бататган бэхжүүлэх ээлжит арга хэмжээ гэж ажиглагчид үзэж байна.
Эх сурвалж: Associated Press
