Өнгөрсөн Бямба гараг Хятадын уламжлалт сар шинийн баярын битүүний өдөр байв. Энэ өдөр Вашингтонд болсон NBA-гийн Washington Wizards, Orlando Magic багуудын тоглолтын үеэр саяхан БНХАУ-ын гадаад хэргийн сайдаар томилогдсон Чинь Ган сар шинийн мэндчилгээ дэвшүүлжээ.
Чинь Ган өнгөрсөн сарын сүүлээр гадаад хэргийн сайдын албан тушаалд томилогдсон бөгөөд өмнө нь тэр БНХАУ-аас АНУ-д суух элчин сайдаар 17 сарын турш ажилласан юм.
Өмнөх гадаад хэргийн сайд Ван И одоо ерөнхийлөгч Ши Жиньпиний гадаад бодлогын зөвлөх болоод байгаа.
Тоглолтын хоёр дахь үеийн завсарлагаар Чинь Ганы видео мэндчилгээний бичлэгийг танхимын том дэлгэцээр үзүүлжээ.
“Хятадын болон Америкийн ард түмэнд би туулай жилийн мэнд хүргэж, гэрэлт ирээдүйг хүсэн ерөөж байна. Бүх хүмүүст амжилт хүсэж, тоглолт сайхан болохыг ерөөе” гэж мэндчилгээндээ тэр хэлсэн байна.
Сүүлийн саруудад АНУ, БНХАУ-ын талууд харилцаагаа сайжруулах алхмыг хийж эхлээд байгаа.
Арваннэгдүгээр сард АНУ-ын ерөнхийлөгч Жо Байден, БНХАУ-ын дарга Ши Жиньпин нар Индонезын Бали аралд анх удаа нүүр тулж уулзсан юм.
АНУ-ын төрийн нарийн бичгийн дарга Энтони Блинкен ирэх сард БНХАУ-д айлчлах гэж байна.
Өнгөрсөн долоо хоногт АНУ-ын сангийн сайд Жанет Йелен, Хятадын ерөнхий сайдын орлогч Лю Хэ нар Давосын чуулганы үеэр уулзаж, сангийн сайдын түвшний харилцан айлчлалуудыг зохион байгуулахаар тохиролцсон юм.
Хоёр улсын хооронд спорт дээр түшиглэсэн дипломат харилцаа амжилттай хэрэгжиж байсан түүхтэй.
1970-аад оны үед хоёр улс ширээний теннисийн тамирчдаа харилцан солилцсоны дараа ерөнхийлөгч Ричард Никсон, Хятадын удирдагч Мао Зэдун нарын түүхэн уулзалт болж байв.
Сая тоглолтынх нь үеэр мэндчилгээ дэвшүүлсэн Washington Wizards баг 1979 онд Хятадад зочилсон NBA-гийн анхны баг болж байжээ.
Эх сурвалж: South China Morning Post
