Өнгөрсөн сард Умард Солонгосын тал тагнуулын дронуудаа Өмнөд Солонгосын хилийг давуулж нисгэсний зарим нь тус улсын ерөнхийлөгчийн Хөх ордны тусгай хамгаалалтын бүсэд хүрсэн билээ.

Дронуудыг илрүүлж, устгаж чадаагүй Өмнөд Солонгосын арми энэ явдлын дараа нэлээд шүүмжлүүлж, тус улсын засгийн газар дроноос хамгаалах системээ сайжруулах амлалт авч байв.

Сонирхолтой нь энэ өдөөн хатгалгаас 55 жилийн өмнө Умард Солонгосын эрх баригчид тусгай бэлтгэгдсэн алуурчдыг Өмнөд Солонгосын ерөнхийлөгчийн ордон руу илгээж байжээ.

1968 оны нэгдүгээр сарын 17-ны шөнө Умард Солонгосын тусгай бэлтгэгдсэн 31 цэрэг хоёр Солонгосын хилийн шугамыг нууцаар давсан юм.

124 дүгээр тасаг нэртэй энэ бүлгийн зорилго нь Өмнөд Солонгосын ерөнхийлөгч Пак Чун Хэгийн амийг хөнөөх байжээ.

Тэдний Сөүл хот хүрэх, Хөх ордонд нэвтрэх хүртэл хэрэгжих нууц төлөвлөгөөг нарийвчлан бэлтгэсэн байна.

Гэвч Хөх ордонд хүрэхээс 300 орчим метрийн зайд ирэх үед нь тэдний төлөвлөгөөг Өмнөд Солонгосын тал таслан зогсоож байжээ.

АНУ болон Өмнөд Солонгос бүх анхаарлаа Вьетнамын дайнд төвлөрүүлээд байсан тэр үед Умард Солонгосын удирдагч Ким Ил Сун дэлхий дахинд Солонгосын дайн дуусах болоогүйг сануулахыг хүсэж байжээ.

Алуурчдын багийг илгээхээс өмнө хоёр Солонгосын хил дээрх мөргөлдөөн эрчимжиж, Умард Солонгосын зэвсэгт бүлэглэлүүд Өмнөдийн нутагт партизаны үйл ажиллагаа явуулдаг болоод байв.

1966-аас 1967 оны хооронд Өмнөд Солонгосын тал 130 орчим хил зөрчигчийг устгаж, 43-ыг баривчилж байжээ. Энэ хугацаанд Өмнөдийн тал бас 130 хүнээ алдсан байна.

Энэ үед Умард Солонгосын зэвсэгт хүчнээс сонгон шалгаруулсан 124 дүгээр тусгай тасгийн элит цэргүүд бэлтгэлээ дуусгаж байжээ.

Тэднийг нүцгэн гараар тулалдах, зүг чиг тодорхойлох, төрөл бүрийн объектод нэвтрэх, партизаны дайн явуулах зэрэг арга техникт сургаж, бэлдсэн байна.

Бэлтгэл сургуулилалт нь маш хатуу байсан тухай тэднээс олзлогдсон цэрэг сүүлд ярьсан байдаг. Тэд хатуу ширүүн бэлтгэлийн үеэр амьд үлдэхийн тулд нэг нэгнээ буудах, хутгалах нь наад захын хэрэг байжээ.

Шалгарч үлдсэн 31 цэрэгт тус бүрд нь автомат буу, гар буу, 320 сум, 14 гар бөмбөг, нэг хутга хуваарилсан байна. Тэд Өмнөд Солонгосын цэргийн дүрэмт хувцас өмсөж, шаардлагатай тохиолдолд хэрэглэх энгийн иргэний хувцас авч явжээ.

Тусгай тасгийнхан өдөр нь унтаж, шөнө нь цагт 10 гаруй километр зам туулж байсан гэдэг. Аяллынхаа хоёр дахь өдөр тэд ууланд түлээ бэлтгэж байсан ах дүү дөрөвтэй санамсаргүй тааралджээ.

Тушаал ёсоор тэд ганц ч гэрч амьд үлдээх ёсгүй байв. Гэтэл уулын хөрс тэс хөлдүү байсан тул ах дүүсийг алаад цогцсыг нь булж нуух боломжгүй болжээ.

Ингээд тэд олзлогдсон ах дүүст Коммунизмын давуу талыг сайн ухуулж сурталчилсны дараа өөрсдийнх нь талаар бусдад мэдээлэл өгөхгүй гэсэн ам өчиг аваад явуулсан байна.

Гэвч суллагдсан хүүхдүүд Умард Солонгосын цэргүүд ууланд явж байгаа тухай эрх баригчдад даруй мэдээлснээр Өмнөд Солонгосын зэвсэгт хүчин өндөржүүлсэн бэлэн байдалд шилжжээ.

Гэсэн хэдий ч Өмнөдийн тал хил нэвтрэгчдийг илрүүлж чадалгүй мөрдсөөр ерөнхийлөгчийн Хөх ордноос 300 метрийн зайтай оршдог харуулын цэгт нэгдүгээр сарын 21-ний өдөр анх тулгарсан байна.

Өмнөд Солонгосын армийн цэргүүд танкаар хүч нэмэгдүүлэн харуулын цэгт ирсний дараа ширүүн буудалцаан болж байжээ.

Төлөвлөгөө бүтэлгүйтсэнийг ойлгосон Умард Солонгосын тусгай тасгийнхан тал тал руу тарж зугтах тушаал авсан байна.

Өмнөд Солонгос даяар эрэн сурвалжлах ажиллагаа явагдаж, нэгдүгээр сарын 29-ний өдөр гэхэд хоёроос бусад нь амь үрэгджээ. Тэдний зарим нь алагдаж, зарим нь амиа хорлосон байна.

Амьд үлдсэн хоёр цэргийн нэг Ким Шин Жо баривчлагдаж, Пак Жэ Гён эх орон руугаа зугтаж чаджээ.

Энэхүү ажиллагааны үеэр Өмнөд Солонгосын армийн 68 цэрэг, АНУ-ын гурван цэрэг алагдсан байна.

Хамтарч ажилласныхаа төлөө Ким Шин Жо 1970 онд суллагдаж, Өмнөд Солонгосын иргэн болж байжээ.

Харин түүний эцэг, эх, ах дүүсийг нь Умард Солонгост цаазалсан байна.

Ким Шин Жо одоо болтол Өмнөд Солонгост амьд сэрүүн байгаа бол оргосон ганц цэрэг Пак Жэ Гён сүүлд Умард Солонгосын армийн генерал болжээ.

Алуурчдын бүлгийг Өмнөд Солонгос руу илгээснээ Пёньяны эрх баригчид огт хүлээн зөвшөөрч байгаагүй юм.

Харин Ким Ил Суныг устгахаар илгээсэн Өмнөд Солонгосын тусгай тасгийнхан эргээд удирдагчдынхаа эсрэг бослого гаргасан гэх үлгэрийг зохиож байжээ.

Эх сурвалж: Business Insider