Африк тивийн Зимбабве улсад төрийн айлчлал хийж буй Беларусийн ерөнхийлөгч Александр Лукашенко нэгэн өвөрмөц бэлэг хүлээж авсныг БелТА агентлаг өчигдөр мэдээлжээ.
Тэрбээр Беларусийн хөдөө аж ахуйн техник хэрэгслийг Зимбабвегийн тариаланчдад хүлээлгэж өгөх ёслолын үеэр тус улсын ерөнхийлөгч Эммерсон Мнангагвад өөрийн үйлдвэрийн “Беларусь 92” загварын тракторыг бэлэглэсэн байна.
Хариуд нь Африкийн улсын тэргүүн арслангийн чихмэл Лукашенкод бэлэглэжээ.
“Юуны өмнө манай улсын эсрэг эдийн засгийн хориг арга хэмжээ авсан Америкчууд болон Өрнөдийнхөнд би баярласнаа хэлмээр байна. Тэгээгүй бол энэ том талбайд Беларусийнх биш, Америк, Германы тракторууд ирэх байлаа” гэж Лукашенко энэ үеэр хэлсэн байна.
Тэрбээр нэгдүгээр сарын 30-ны өдөр Зимбабве улсад айлчлан ирсэн юм. Лукашенко өөр улсын төрийн тэргүүнд бас Беларусийн нэрийн хуудас болсон тракторыг бэлэглэж байсан удаатай.
2022 оны аравдугаар сард тэр ОХУ-ын ерөнхийлөгч Владимир Путинд төрсөн өдрийг нь тохиолдуулан шинэ загварын трактор бэлэглэж байжээ.
Эх сурвалж: ТАСС
