АНУ-ын өндөр технологийн дрон үйлдвэрлэгч General Atomic Aeronautical Systems компани өөрийн сүүлийн үеийн бүтээгдэхүүнүүдээс хоёр ширхгийг $1-ийн үнээр Украинд нийлүүлэх санал тавьжээ.
Ингэхийн тулд засгийн газраасаа зөвшөөрөл хүссэн байна.
Тус компанийн нийлүүлэхийг хүссэн хоёр дрон нь Grey Eagle болон Reaper юм.
Grey Eagle нь тагнуулын зориулалттай хамгийн орчин үеийн техник бол Reaper нь онцгой байг алсын зайнаас устгах зориулалттай зэвсэг ажээ.
Reaper-ийг АНУ-ын зэвсэгт хүчин Афганистан, Сири, Ирак зэрэг мөргөлдөөнтэй бүс нутгуудад чухал дайснаа устгахад ашиглаж байсан юм байна.
Өнгөрсөн хугацаанд АНУ-ын засаг захиргаа Украинд олон тооны зэр зэвсэг нийлүүлж байсан ч дээрх хоёртой дүйцэх өндөр түвшний дрон огт илгээгээгүй байгаа юм.
“Оросын эзлэн түрэмгийллийн эхний өдрөөс хойш бид Украины зэвсэгт хүчинд MQ-9 Reaper, MQ-1C Grey Eagle дронуудыг илгээх хувилбаруудыг судалж эхэлсэн юм” гэж General Atomic Aeronautical Systems компанийн гүйцэтгэх захирал Линден Блю мэдэгджээ.
Тэрбээр Украины мэргэжилтнүүдийг үнэ төлбөргүй сургаж өгөхөө амласан байна.
Тус компани нийлүүлэх дронуудаа бүх дагалдах хэрэгсэл, үйлчилгээнийх нь хамт $1-ийн бэлгэдлийн үнээр өгөх гэнэ.
“Бид ямар нэг нөхцөл тулгаагүй онцгой нөхцөлтэй санал тавьж байна. Одоо зөвхөн АНУ-ын засгийн газрын зөвшөөрөл л хэрэгтэй. Бидний үзэж байгаагаар энэ дайнд Украиныг ялуулахад мэдээллийн ноёрхол чухал шаардлагатай нь эхнээсээ тодорхой байсан” гэж Блю ярьжээ.
Эх сурвалж: AFP
