Туркийн зүүн өмнөд нутагт маш хүчтэй газар хөдөлсний улмаас амь үрэгдсэн хүний тоо 3,400 даваад байна.
Тэгвэл энэ тоо цаашид найм дахин өсөх магадлалтайг Дэлхийн Эрүүл Мэндийн Байгууллага (ДЭМБ) мэдэгджээ.
Даваа гарагийн үүрээр 04:17 цагт Сирийн хилийн ойролцоох Газиантеп хотын ойролцоо 7.8 магнитудын хүчтэй газар хөдлөлт бүртгэгдсэн юм. Чичиргээний төв цэг нь газрын гадаргаас 17.9 км-ийн гүнд байжээ. Энэ нь Туркийн түүхэнд тохиосон хамгийн хүчтэй газар хөдлөлтүүдийн нэгд тооцогдож байна. Чичиргээ хоёр минутын турш зогсолтгүй үргэлжилснийг гэрчүүд мэдээлжээ.
Үүнээс 12 орчим цагийн дараа хоёр дахь газар хөдлөлт бүртгэгдсэн юм. 7.5 магнитудын хүчтэй хоёр дахь газар хөдлөлт анхны хөдлөлтийн цэгээс умар зүгт Туркийн Кахраманмарас мужийн Элбистан дүүрэгт болжээ.
Эхний хөдлөлтийн дараах 12 орчим цагийн хугацаанд гамшгийн бүс нутагт доод тал нь 5 магнитудын хүчтэй нийт 13 чичиргээ бүртгэгдсэн тухай АНУ-ын геологийн хүрээлэн мэдээлсэн юм.
Турк болон Сири улсын нутагт амь үрэгдсэн хүний тоо цаг тутамд нэмэгдсээр байна.
Өвлийн хүйтэн цаг агаарын хүнд нөхцөл байдалд барилгын нурангиас дарагдсан хүмүүсийг аврах ажиллагаа үргэлжилж байна.
Хоёр улсын нутаг дэвсгэрт нурсан барилгын тоо хэдэн мянгаар тоологдож байгаа юм.
2,000 гаруй жилийн настай түүхийн дурсгал болох Газиантепын цайз хүртэл нурсныг эх сурвалжууд мэдээлжээ.
Дэлхийн олон улс орон аврагчдын баг, эрэлч нохой, багаж төхөөрөмжөө Турк улс руу илгээж байна.
Турк бол дэлхийн хамгийн идэвхтэй газар хөдлөлтийн бүс нутгуудын нэг юм. 1999 онд тус улсын баруун хойд хэсэгт хүчтэй газар хөдлөхөд 17,000 гаруй хүн амь үрэгдэж байв. Туркийн түүхэнд хамгийн хүчтэйд тооцогдох газар хөдлөлт 1939 онд зүүн Эрзинкан мужид болоход 33,000 хүний амь үрэгдэж байжээ.
Дэлхийн 45 улс тусламж үзүүлэх санал тавьсныг Туркийн ерөнхийлөгч Рэжэп Тайип Эрдоган мэдээлсэн байна.
НҮБ-ын ерөнхий нарийн бичгийн дарга Антонио Гутерреш гамшигт нэрвэгдсэн хүмүүст тусламжийн гараа сунгахыг дэлхийн улс орнуудад уриалжээ.
Газар хөдлөлтөд нэрвэгдсэн 10 хотын нэрийг Туркийн дотоод хэргийн сайд Сулейман Сойлу зарласан байна. Тэдгээрт Хатай, Османие, Адяаман, Малатя, Санлиурфа, Адана, Дияарбакир, Килис зэрэг хотууд багтжээ.
Хоёр тектоник хавтан хэвтээ чиглэлд харилцан эсрэг чиглэлд гулсаж мөргөлдсөн нь энэ удаагийн газар хөдлөлтийг маш хүчтэй болгосныг мэргэжилтнүүд тайлбарлаж байна.
Туркийн телевизийн шууд нэвтрүүлгийн үеэр хоёр дахь газар хөдлөлт болсныг дараах дүрс бичлэг харуулжээ.
Эх сурвалж: BBC, The Guardian
