Даваа гарагт Турк-Сирийн хилийн ойролцоо тохиосон хүчтэй газар хөдлөлтийн улмаас амиа алдсан хүний тоо 12,000 хүрлээ.
Лхагва гарагийн байдлаар Турк улсад 9,057 хүн, Сири улсад 2,950 хүн амь үрэгдсэн нь батлагджээ.
Турк улсад гамшгийн хамрах хүрээ баруун талдаа Адана, зүүн талдаа Диярбакир хот хүртэл 450 км урт газар нутгийг хамарсан байна. Энэ завсарт 13.5 сая хүн оршин суудаг юм.
Сири улсад гамшгийн хамрах хүрээ газар хөдлөлтийн төв цэгээс өмнө зүгт 250 км зайтай оршдог Хама хот хүрчээ.
Лхагва гарагт гамшгийн бүс нутагт хүрэлцэн очсон Туркийн ерөнхийлөгч Рэжэп Тайип Эрдоган засгийн газар нь газар хөдлөлтийн дараа шуурхай арга хэмжээ авч чадалгүй цаг алдсаныг хүлээн зөвшөөрсөн байна.
Тэрбээр гамшгийн улмаас орон гэргүй болсон бүх хүмүүсийг орон байраар хангахаа амлажээ.
Орон гэргүй болсон хүмүүсээс гадна гамшгийн дараа нурах аюултай болсон байшин барилгад амьдардаг хүмүүс өвлийн хүйтэнд гудамж талбай, автомашинд хоноглож байгаа юм.
Аврах ажиллагаа тасралтгүй үргэлжилж, нуранги дороос үхсэн болон амьд хүмүүсийг гаргасаар байгаа ч цаг өнгөрөх тусам амьд хүн олдох магадлал багассаар байна.
Ажиллагаанд мэргэжилтнүүдийн туршлага чадвар, техник хэрэгсэл дутагдаж байгаа талаар гамшигт нэрвэгдсэн бүс нутгийн иргэд гомдоллож, үүнд эрх баригчдыг буруутгаж байгаа.
Хөрш Сири улсад бас нөхцөл байдал хүнд байна.
НҮБ-д суугаа Сирийн элчин сайд аврах ажиллагаанд хүн хүч, техник хэрэгсэл дутагдаж байгааг мэдээлээд үүнд олон жил үргэлжилсэн иргэний дайн, Өрнөдийн орнуудын тавьсан эдийн засгийн хоригийг буруутгажээ.
Тус улсад гамшгийн дараа орон гэргүй болсон 300,000 орчим хүнийг байрлуулах 180 хоргодох байр нээсэн талаар засгийн газар нь мэдээлсэн байна. Гэхдээ энэ нь Сирийн засгийн газрын хяналтад байгаа газар нутагт авсан арга хэмжээ юм. Харин засгийн газрын эсрэг босогчдын хяналтад байгаа газар нутагт нөхцөл байдал ямар байгаа талаар мэдээлэл хомс байна.
Турк, Сирийн хотуудад иргэдийг гэртээ унтаж байхад буюу үүрээр газар хөдөлж, орон сууцны олон зуун барилга нурсан тул амь үрэгдсэн хүний тоо цаашид өсөх нь тодорхой байгаа.
Туркийн ерөнхийлөгч Эрдоган өчигдөр гамшгийн бүс нутагт сэтгүүлчидтэй уулзахдаа “Бидэнд асуудал олон байна. Гэхдээ бид бэрхшээлийг давж чадна. Маргааш, цаашдаа нөхцөл байдал дээрдэх болно” гэж амлажээ.
Тэрбээр засгийн газрын хариу арга хэмжээ удаашралтай байгаа талаар шүүмжлэлийн хариуд “Одоо бол эвлэлдэн нэгдэх цаг. Ийм хүнд үед улс төрийн ашиг сонирхлын үүднээс сөрөг кампанит ажиллагаа явуулж буй хүмүүсийг би тэвчиж чадахгүй” гэж анхааруулсан байна.
Ямартай ч энэхүү байгалийн гамшиг ирэх тавдугаар сард болох Туркийн парламентын сонгуулийн үр дүнд нөлөөлөх нь тодорхой болоод байгаа. Газар хөдлөлтөөс ч өмнө ирэх сонгууль сүүлийн 20 орчим жил засагласан Эрдоганд томоохон сорилт болох нь тодорхой болоод байсан юм.
Өчигдөр Истанбулын хөрөнгийн бирж таван өдрийн турш арилжаагаа зогсоохоор болсон нь маш ховор шийдвэр байлаа.
Эх сурвалж: Reuters