Даваа гарагт болсон газар хөдлөлтийн дараа Сирийн баруун хойд нутгийн нэг хотын нуранги дороос дөнгөж төрөөд байсан охиныг олж аварсан юм.

Жиндайрис хотын нурангиас охиныг олоход эхтэйгээ хүйгээр холбоотой хэвээр байжээ. Харамсалтай нь охины эцэг, эх, дөрвөн ах эгч нь амьд гараагүй юм.

Одоо эмнэлэгт байгаа охинд Аяа буюу араб хэлээр “гайхамшиг” гэсэн утгатай нэр өгчээ.

“Даарч бээрсэн, бие нь шарх сорвиор дүүрэн охиныг Даваа гарагт авчирсан. Тэгэхэд охин дөнгөж амьсгаатай байсан бол одоо бие нь харьцангуй сайжирч, тогтворжсон” гэж түүнийг арчилж буй эмч Хани Маруф ярьсан байна. Охиныг холын хамаатан нь Сирийн Африн хотын эмнэлэгт авчирч байжээ.

Тоос шороонд дарагдсан Аяа охиныг нуранги дороос гаргаж буйг харуулсан дүрс бичлэг сошиал ертөнцөд хүчтэй тараад байгаа.

Үүний үр дүнд олон мянган хүн охиныг үрчилж авах хүсэлтээ илэрхийлжээ.

Тухайлбал Кувейтийн телевизийн нэг хөтлөгч “Хэрвээ хуулиар зөвшөөрөгддөг бол би охиныг үрчилж авахад бэлэн байна” гэж нэвтрүүлгийнхээ үеэр хэлсэн юм.

Эмнэлгийн менежэр Халид Аттиах дэлхийн олон орноос үрчлэх хүсэл сонирхлоо илэрхийлсэн хүмүүсийн дуудлагыг хүлээж авах болсноо бас ярьжээ.

Дөрвөн сарын өмнө охин төрүүлсэн түүний гэргий одоо Аяаг хөхөөрөө хооллож байгаа юм байна. “Одоохондоо би охиныг хэн нэгэнд үрчлүүлэх сонирхолгүй байна. Энд ирсэн цагаас нь хойш би түүнийг өөрийн охин шигээ асарч байгаа” гэж Аттиах эмч ярьжээ.

Даваа гарагт болсон хүчтэй газар хөдлөлтийн улмаас Сири улсад нийтдээ 3,000 гаруй хүн амиа алдаад байна. Гэхдээ энэ нь Дамаскийн засгийн газрын хяналтад байдаг бүс нутагт учирсан хохирлын хэмжээ юм. Сөрөг хүчний хяналтад байгаа газар нутагт ямар хэмжээний хохирол учирсан талаар мэдээлэл одоохондоо алга байна.

Эх сурвалж: BBC