Оросын хувийн зэвсэгт хүчний компани Вагнер групп шоронгийн хоригдлуудыг хөлсний цэрэгт элсүүлж, Украины фронтод илгээх хөтөлбөрөө зогсоосныг өчигдөр мэдээлжээ.

Тус компанийн тэргүүн Евгений Пригожин өчигдөр Оросын хэвлэлийн сэтгүүлчийн асуултад хариулахдаа “Шоронгийн хоригдлуудыг элсүүлэх Вагнерын хөтөлбөр бүрэн зогссон. Бид элссэн хүмүүст өгсөн амлалтаа бүрэн хэрэгжүүлж байгаа” гэж ярьсан байна.

Өнгөрсөн оны зунаас эхлэн тус байгууллага Оросын шоронгуудад хөлсний цэрэг элсүүлэх ажиллагааг зохион байгуулж байсан юм.

Вагнер группийг үүсгэн байгуулсан Пригожин өөрөө Зөвлөлт Холбоот Улсын үед есөн жилийн хугацаагаар шоронд хоригдож байсан гэдэг.

Тэрбээр сүүлд нийтийн хоолны бизнес эрхэлж, Кремлийн хүндэтгэлийн зоогийг хариуцах тендерт шалгарснаар ерөнхийлөгч Путиний шадар хүн болсон гэгддэг юм.

Пригожин шоронгийн хоригдлуудад Украинд зургаан сар тулалдсаны дараа амьд үлдвэл эрх чөлөө олгох амлалт өгч байв.

Вагнер групп хэдэн хоригдол элсүүлсэн талаар тоо баримт зарлаж байгаагүй. Харин Оросын засгийн газраас гаргасан тоо баримтаас үзвэл өнгөрсөн оны наймаас арваннэгдүгээр сарын хооронд тус улсын нийт хоригдлын тоо 20,000 гаруйгаар буурсан байна.

Харин энэ оны нэгдүгээр сараас эхлэн тоо нь тогтворжжээ.

АНУ-ын тагнуулын албад Вагнер өнгөрсөн хугацаанд 40,000 орчим хоригдлыг Украинд илгээсэн гэж тооцоолсон байдаг.

2014 онд байгуулагдсан Вагнер групп одоо Украинаас гадна Африк, Латин Америк, Ойрх Дорнодын орнуудад үйл ажиллагаа явуулж байгаа.

Сүүлийн үед Украины дайнд голлох үүрэгтэй оролцох болсон Вагнер группийн тэргүүн ОХУ-ын батлан хамгаалах яамны удирдлагуудын бодлого, үйл ажиллагааг ил тод шүүмжилдэг болсон.

Өнгөрсөн долоо хоногт Их Британийн батлан хамгаалах яамнаас гаргасан тагнуулын тайланд шоронгоос хөлсний цэрэг элсүүлэх Вагнерын ажиллагаа зогссон нь дээрх зөрчилтэй холбоотой байж болзошгүй талаар дурджээ.

Эх сурвалж: Reuters