Газар хөдлөлтөд нэрвэгдсэн Турк, Сирийн иргэдэд төрөл төрөгсөдтэйгөө хэсэг хугацаанд хамт амьдрах боломж олгож байгаагаа Герман улсын засгийн газар зарлажээ.
“Энэ бол шуурхай тусламжийн нэг хэлбэр. Герман дахь Турк, Сири гаралтай гэр бүлүүдийг гамшигт өртсөн төрөл төрөгсдөө ямар нэг хүнд сурталгүйгээр түр хугацаанд татаж авах боломжоор хангаж байна” гэж тус улсын дотоод хэргийн сайд Нэнси Файзер өнгөрсөн амралтын өдөр Bild сонинд ярьсан байна.
Ийм шалтгаанаар Германд ирэх хүмүүст гурван сарын хугацаатай ердийн виз олгохоор болж, бэлтгэл ажлыг эхлүүлсэн гэнэ.
Герман улсад Турк гаралтай 2.9 сая хүн амьдардгийн талаас илүү хэсэг нь Туркийн иргэний харьяалалтай байдаг ажээ.
Сири гаралтай иргэдийн тоо 924,000 орчим гэсэн тоо байдаг.
Энэ тоо 2015 онд канцлер Ангела Меркелийн зарласан цагаачлалын нээлттэй бодлоготой холбоотойгоор эрс нэмэгдэж байжээ.
Цагаачдад нээлттэй болохын өмнө 2014 оны байдлаар Герман дахь Сири гаралтай хүмүүсийн тоо 118,000 байсан байна.
Эх сурвалж: Aljazeera
