Европын талыг баримтлагч засгийн газрыг нь түлхэн унагаж, Москвагийн бодлогыг дэмжигчдэд засгийн эрхийг шилжүүлэх нууц ажиллагааг Оросын талаас хэрэгжүүлэх гэж байсан тухай Молдова улсын ерөнхийлөгч Майя Санду өчигдөр мэдээлжээ.
Долоо хоногийн өмнө Брюссель хотод үг хэлэхдээ хөрш Украины ерөнхийлөгч Володимир Зеленский ийм нууц төлөвлөгөөний талаар анх удаа мэдэгдэж, сүүлд Молдовын тагнуулын албаныхан үүнийг нь баталж байсан юм.
“Энгийн иргэд шиг хувцасласан тусгай бэлтгэгдсэн хүмүүс хүчирхийлэл үйлдэх, төр засгийн зарим барилга байгууламж руу дайрах, өндөр албан тушаалтнуудыг барьцаалах хүртэл ажиллагаа явуулахаар төлөвлөж байжээ” гэж Санду өчигдөр сэтгүүлчидтэй уулзахдаа ярьжээ.
Жилийн өмнө Украины нутаг дэвсгэрт Оросын цэрэг халдан довтолсны дараа хуучин Зөвлөлтийн бүрэлдэхүүнд багтаж байсан 2.6 сая хүн амтай Молдова улс Өрнөдтэй улам ойртохыг хичээх болсон юм.
Өнгөрсөн оны зургаадугаар сард тус улс Украины хамт Европын Холбооны гишүүнд нэр дэвшигчийн статусаа авч байв.
Оросын талаас төлөвлөсөн хуйвалдаан нь “Үндсэн хуулийн дэг журмыг нурааж, засгийн эрх мэдлийг хууль бусаар булаах, тус улсад өрнөж буй Европын интеграцын үйл явцыг тасалдуулж, Москвагийн хяналтад шилжүүлэх” зорилготой байсныг Санду тайлбарлажээ.
“Манай улсад хүчирхийлэл, үймээн самуун дэгдээх Кремлийн оролдлого хэзээ ч бүтэхгүй” гэж тэр амласан юм.
Сандугийн хийсэн мэдэгдэлд одоогоор ОХУ-ын талаас хариу тайлбар өгөөгүй байна.
Түүний мэдээлснээр өнгөрсөн оны арваас арван хоёрдугаар сарын хооронд Молдовын цагдаа, тагнуулын албад уг хуйвалдааныг таслан зогсоосон гэнэ.
Өнгөрсөн нэг жилийн хугацаанд Украины дайн Молдова улсын улс төр, нийгэм, эдийн засгийн амьдралд хүчтэй нөлөөлж байгаа. Москвагийн эрх баригчид хийн нийлүүлэлтээ бууруулснаас эрчим хүчний хямрал үүсэж, инфляц эрчимтэй өссөн. Үүнийг дагаад нийгэмд тогтворгүй байдал нэмэгдсэн юм. Бас хөрш Украины талаас нутаг дэвсгэрт нь пуужин унасан тохиолдол хэд хэдэн удаа гарч байв.
Хамгийн сүүлд өнгөрсөн Баасан гарагт нэг пуужин Украины талаас Молдовын нутаг дэвсгэрт унасан байна.
Москвагийн дэмжлэгтэйгээр Молдовоос салан тусгаарласан Транснистрийн бүс нутагт байдал хүндэрч, өнгөрсөн онд цуврал дэлбэрэлтүүд гарч байлаа. Энэ бүс нутагт Оросын армийн 1,500 орчим цэрэг тогтмол байрладаг.
470,000 орчим хүн амтай Транснистр 1992 оны иргэний дайнаас хойш салан тусгаарлагчдын хяналтад байгаа юм. Украины дайн энэ бүс нутаг хүрээгээ тэлэх эрсдэлтэй гэж ажиглагчид үздэг.
“Манай төр засгийн холбогдох байгууллагууд нөхцөл байдлыг хянаж, эрсдэлээс урьдчилан сэргийлэх арга хэмжээнүүдийг авч хэрэгжүүлсээр байгаа” гэж хэлсэн Санду тус улсын парламент ойрын үед тусгай албадыг шаардлагатай зэр зэвсэг, тоног төхөөрөмжөөр хангах хуулийн төслийг хэлэлцэх гэж буйг мэдээлсэн байна.
Өнгөрсөн долоо хоногийн Баасан гарагт Молдовын ерөнхий сайд Наталья Гаврилица өөрийн хүсэлтээр огцорсон нь гэнэтийн шийдвэр болсон юм.
Ерөнхийлөгч Санду түүний оронд өөрийн батлан хамгаалах, аюулгүй байдлын бодлогын зөвлөх, Өрнөдийн талыг баримталдаг эдийн засагч Дорин Речаныг томилжээ.
Эх сурвалж: Associated Press