Японы хамгийн том автомашин үйлдвэрлэгч Тоёота компанийн гүйцэтгэх захирлаар томилогдоод удаагүй байгаа Кожи Сато өчигдөр өөрийн удирдлагын багийг танилцуулжээ.

Энэ үеэр тэр багийнх нь гол зорилт “цахилгаанжуулалт” байхыг зарлаад 2026 онд шинэ үеийн цахилгаан хөдөлгүүрт анхны бүтээгдэхүүнээ танилцуулахыг мэдэгдсэн байна.

Гэхдээ энэ бүтээгдэхүүн нь Lexus брэндийн дор гарах ажээ.

“Энэ шилжилтийг Lexus манлайлах болно. Би өөрийгөө хөл бөмбөгийн багийн ахлагч гэж харж байна” гэж өчигдөр Токио хотод болсон хэвлэлийн хурлын үеэр Сато хэлсэн юм.

Өчигдөр тэрбээр Умард Америк, Азийн зах зээлийг хариуцах захирлуудаас гадна хүлэмжийн хийг бууруулах, аюулгүй байдлыг сайжруулах технологи хариуцсан зэрэг бусад чухал албан тушаалтнуудаа танилцуулжээ.

Lexus брэндийг хариуцаж байсан Кожи Сатогийн шинэ томилгоог өнгөрсөн сард Тоёота компанийн удирдах зөвлөл зарласан ба дөрөвдүгээр сарын 1-нээс тэр үүрэгт ажилдаа орох юм.

Хосолсон хөдөлгүүртэй Prius бүтээгдэхүүнээрээ дэлхийн зах зээлийг байлдан дагуулсан Тоёота компани харин цахилгаан хөдөлгүүртэй автомашины технологи хөгжүүлэх чиглэлд нэлээд хойрго хандаж байв.

Тиймээс энэ чиглэлд өрсөлдөгчдөөсөө хоцорч байгаа.

Анхны бүтээгдэхүүн нь зүгээр нэг цахилгаан автомашины тоог нэмэгдүүлэх зүйл биш, Тоёота энэ салбарт яг юу хийж чадахыг харуулсан бүтээгдэхүүн байхыг Сато амлажээ.

Тус компанийг олон жил удирдсан Акио Тоёода шинэ гүйцэтгэх захиралд ажлаа шилжүүлсний дараа удирдах зөвлөлийн дарга болно.

Тэрбээр Тоёота компанийг үүсгэн байгуулагчийн ач хүү юм.

Эх сурвалж: Associated Press