Энэтхэгийн үндэсний агаарын тээвэрлэгч Air India компани Airbus, Boeing компаниудаас 470 шинэ нисэх онгоц худалдан авах гэрээг саяхан байгуулсан нь түүхэнд байгаагүй том наймаа болжээ.
Тус компани нь Энэтхэгийн бизнесийн аварга групп Татагийн эзэмшилд байдаг юм.
2011 онд American Airlines компани 460 шинэ нисэх онгоц үйлдвэрлэгчээс захиалж байсан нь өмнөх дээд амжилт байжээ.
Air India компанийн нисэх онгоцнуудыг бүрэн шинэчилж, дэлхийн агаарын тээврийн зах зээлд хүчтэй өрсөлдөх төлөвлөгөөтэй байгааг Тата группийн ерөнхийлөгч Чандрасекаран мэдэгдсэн байна.
Тата групп хоёр жилийн өмнө дампуурлын ирмэгт байсан төрийн өмчит Air India компанийг худалдан аваад таван жилийн дотор бүрэн шинэчлэх зорилт тавиад байгаа.
Шинэ онгоцнуудын эхнийх нь энэ оны сүүлээр ашиглагдаж эхлэх юм байна.
Air India компанийн энэ шинэчлэлт Персийн булангийн орнуудын авиа компаниудад томоохон дарамт шахалт учруулах нь тодорхой болжээ. Одоо Энэтхэгийн агаарын тээврийн зах зээлд Emirates, Qatar Airways, Etihad зэрэг энэ бүсийн орнуудын компаниуд гол үүрэгтэй ажилладаг.
Air India компанийн захиалгад Airbus A350 зэрэг том оврын онгоцнууд багтсанаас үзвэл тус компани Энэтхэгээс АНУ, Австрали зэрэг холын чиглэлд шууд нислэг үйлдэх төлөвлөгөөтэй байгаа бололтой.
Air India компанийг анх Тата групп байгуулж байсан ч 1950-аад оны үед Энэтхэгийн засгийн газар нийгэмчилж байжээ.
Гэвч төрийн өмч болсон тус компанийн үйлчилгээний чанар, санхүүгийн байдал нь муудаж, асар их өрөнд орсон тул олон жилийн дараа анхны эзэндээ буцаж ирсэн юм.
Тата групп тус компанийг 68 жилийн дараа буюу 2021 онд $2.4 тэрбумаар худалдаж авчээ.
Эх сурвалж: BBC
