Өнгөрсөн оны арваннэгдүгээр сарын 18-нд болсон пуужингийн туршилтыг алдаршуулсан агуулгатай шуудангийн цуврал марк худалдаанд гаргах гэж буй тухай Умард Солонгосын төв хэвлэл Мягмар гарагт мэдээлсэн юм.
Эдгээр маркуудад Ким Жон Уны залгамжлагчаар нэрлэгдэж болзошгүй байгаа Ким Жү Эгийн гэрэл зургуудыг ашиглажээ.
Энэ нь түүний Умард Солонгосын дэглэмийн дараагийн удирдагч болох магадлалыг улам бататгасан хэрэг юм.
Маркууд маргааш буюу Баасан гарагт худалдаанд гарах гэнэ.
Гэхдээ Өмнөд Солонгосын зарим судлаачид Жү Э эцгийнхээ залгамжлагч болно гэдэгт эргэлзэж байгаагаа ярьж байна.
“Умард Солонгосын түүхэнд шинэ удирдагчийн нэрийг албан ёсоор зарлах хүртэл хүмүүс урьдчилж мэдэх боломжгүй байсаар ирсэн. Тиймээс Ким ууган хүүгээ хаалттай хаалганы цаана залгамжлагч болгохоор бэлдэнгээ Жү Эг зүгээр л суртал нэвтрүүлэгтээ ашиглаж байж магадгүй юм” гэж Умард Солонгос судлалын профессор Ян Мү Жин ярьжээ.
Саяхан Өмнөд Солонгосын эх орноо нэгтгэх яамны сайд Квон Юн Сэ парламентын гишүүдэд мэдээлэл өгөхдөө бас Пёньяны залгамжлагчийн талаар эргэлзсэн байр сууриа илэрхийлж байв.
Өнгөрсөн сард 39 нас хүрсэн гэгдэж буй Ким Жон Ун харьцангуй залуу байгаа, Кимийн угсааны гэр бүл дотор эрчүүд давамгай эрхтэй байдаг зэргийг тэр тайлбартаа дурдаж байжээ.
1948 онд байгуулагдсанаасаа хойш Умард Солонгос гурван удирдагчийн нүүр үзсэн нь бүгд эрэгтэй байсан юм.
Судалгаанаас үзвэл тус улсын эрх мэдэлтнүүдийн хүрээнд эмэгтэйчүүдийн эзлэх хувь үргэлж бага байсаар иржээ.
“Ким Жү Эг залгамжлагч болно гэж хэлэхэд хэтэрхий эрт байна. Тус улсын эрх мэдлийг үргэлж хөвгүүд залгамжилсаар ирсэн түүхтэй. Тиймээс Ким Жон Ун үнэхээр энэ уламжлалыг эвдэх бодолтой байгаа эсэх нь эргэлзээтэй” гэж Вашингтонд төвтэй Шинэ Америкийн Аюулгүй Байдлын Төвийн шинжээч Ким Дуён ярьсан байна.
Эх сурвалж: AFP
