Энэ сарын эхээр Туркийн зүүн өмнөд бүс нутагт болсон хүчтэй газар хөдлөлтийн үеэр олон мянган барилга нурсан нь чанар, стандартын асуудлыг хурцаар хөндсөн билээ.

Өнгөрсөн хугацаанд энэ асуудалтай холбогдуулан 612 хүнийг шалгаж эхэлсэн тухай Туркийн хууль зүйн сайд Бямба гарагт мэдээлжээ.

Тэдгээрээс 184 хүнийг баривчилж, үйлдсэн гэмт хэргийг нь шүүхээр болсон байна.

Баривчлагдсан хүмүүсийн дотор барилгын гүйцэтгэгч компаниуд, захиалагчдын төлөөлөл байгааг хууль зүйн сайд Бекир Боздаг мэдээлжээ.

Хоёрдугаар сарын 6-ны өдөр 7.8 ба 7.6 магнитудын хүчтэй дараалсан газар хөдлөлтүүд болоход Турк улсын нутагт 44,000 гаруй, хөрш Сирийн нутагт 5,500 гаруй, нийтдээ 50,000 орчим хүн амиа алдсан нь сүүлийн байдлаар тогтоогдоод байна.

Турк улсын нутаг дэвсгэрт нийт 173,000 орчим барилга байгууламж нурсан буюу ноцтой гэмтсэн юм.

Сөрөг хүчнийхэн барилгын чанарын стандартыг хэрэгжүүлж чадаагүй ерөнхийлөгч Рэжэп Тайип Эрдоганы засгийн газрыг хүчтэй шүүмжилж байгаа.

Эрдоганы тэргүүлдэг Шударга ёс, Хөгжлийн Нам (AKP) сүүлийн 20 орчим жил Туркийн засгийн эрхийг тасралтгүй барьж байна. Туркийн эрх баригчид одоо гамшигт нэрвэгдсэн 1.7 сая хүнийг орон байраар хангах асуудалтай тулгараад байгаа.

Газар хөдлөлтөөс хойш гамшгийн бүс нутагт нийт 9,470 удаагийн чичиргээ бүртгэгдсэн тухай Туркийн засгийн газрын байгалийн гамшигтай тэмцэх агентлаг Бямба гарагт мэдээлжээ.

“Чичиргээ урт удаан хугацаанд үргэлжлэх болно. Хамгийн богинодоо хоёр жил үргэлжлэх тооцоог бид гаргасан” гэж тус агентлагийн захирал Орхан Татар нийслэл Анкара хотод болсон хэвлэлийн хурлын үеэр хэлсэн юм.

Эх сурвалж: Aljazeera