Америкийн технологийн салбарын бизнесмэн Илон Маск алдаад байсан дэлхийн тэргүүн баяны титмээ буцааж авсныг Блүүмбэрг агентлаг мэдээлжээ.
Тус агентлагаас гаргадаг дэлхийн баячуудын жагсаалтыг Маск $187.1 тэрбумын хөрөнгөөр тэргүүлж эхэлсэн байна. Өнгөрсөн оны сүүлээр тэр Францын LVMH группийн гүйцэтгэх захирал Бернар Арнод тэргүүн байраа алдаж, жагсаалтын хоёрдугаарт бичигдэх болсон юм.
Энэ нь Маскийн үүсгэн байгуулсан цахилгаан автомашин үйлдвэрлэгч Тесла компанийн хувьцааны үнэ ханшийн уналттай холбоотой байв.
Нэгдүгээр сарын эхээр Теслагийн хувьцааны ханш $108.10 хүрч байсан бол өчигдрийн арилжааны үеэр $207.63 хүрсэн байна.
Өнгөрсөн он бүхэлдээ Илон Маскийн хувьд маш их донсолгоотой цаг үе байв. Тэрбээр Твиттер компанийг худалдаж авахын тулд Теслагийн олон тэрбумын үнэтэй хувьцаанаасаа зарж байлаа.
Louis Vuitton, Christian Dior, Fendi зэрэг тансаг эдлэлийн олон брэндийг эзэмшдэг Францын тэргүүн баян Арно одоо $182 тэрбумын хөрөнгөөрөө Блүүмбэргийн жагсаалтын хоёрдугаарт эрэмбэлэгдэж байна.
Илон Маск 2021 онд анх Амазоны Жэф Безосоос дэлхийн тэргүүн баяны титмийг шилжүүлэн авч байжээ.
Тэр үеэс хойш Маск, Безос, Арно гурав Блүүмбэргийн гаргадаг дэлхийн тэрбумтнуудын жагсаалтын эхний гурван байрыг тогтмол эзэлсээр ирсэн юм.
Эх сурвалж: Business Insider
