Алматы-Улаанбаатар чиглэлийн нислэгээр хоёрдугаар сарын 23-нд ирсэн Халимаг иргэн “Чингис хаан” нисэх онгоцны буудал дээр саатуулагдсан талаар өөрийн фэйсбүүк хуудсандаа өчигдөр бичсэн байдаг.
Түүнийг ямар шалтгаанаар саатуулсан талаар холбогдох албаны эх сурвалжуудаас тодрууллаа.
“Чингис хаан” олон улсын нисэх онгоцны буудлын албан эх сурвалжаас тодруулахад "Бид мэдээлэл өгөх боломжгүй. Энэ талаарх нарийн мэдээлэл байхгүй. Үүнийг Гадаадын Иргэн Харьяатын Газраас тодруулсан нь зүйтэй байх" хэмээн хэллээ.
Гадаадын Иргэн Харьяатын Газраас "Хилийн шалган нэвтрүүлэх чиг үүрэг нь Хил Хамгаалах Ерөнхий Газарт хамаарагддаг. Энэ нь виз, оршин суух зөвшөөрөлтэй холбоотой асуудал биш учраас мэдээлэл ирээгүй" гэв.
"Одоогоор тухайн зорчигч хилийн дамжин өнгөрөх, түр байрлах байранд саатуулагдсан"
Гадаадын иргэнийг хил дээр саатуулсантай холбоотой асуудлыг Хил Хамгаалах Ерөнхий Газраас тодруулахад "Алматы-Улаанбаатар чиглэлийн "Хүннү Эйр" компанийн онгоцоор хоёрдугаар сарын 23-нд ирсэн ОХУ-ын иргэн байгаа. Тухайн иргэний гадаад паспортын хүчинтэй хугацаа нь хоёрдугаар сарын 22-ны өдөр дууссан байсан.
Хүчин төгөлдөр бус бичиг баримтаар улсын хил нэвтрүүлэх боломжгүй. Монгол Улсын хууль тогтоомжоор хүчин төгөлдөр бичиг баримттайгаар улсын хилээр шалгаж, нэвтрүүлэх чиг үүрэгтэй. Гэтэл тухайн иргэний бичиг баримт нь хүчин төгөлдөр бус байсан учраас хил дээр саатуулсан. Түүнийг буцаах ёстой.
Одоогоор тухайн зорчигч хилийн дамжин өнгөрөх, түр байрлах байранд түр хугацаагаар саатуулагдсан" хэмээн хариуллаа.
"Тухайн иргэнийг буцаах гэхээр өөрөө буцахгүй гэж эсэргүүцэл үзүүлээд байгаа"
Мөн "Олон улсын иргэний нисэхийн тухай Чикагогийн конвенцын есдүгээр хавсралтын 5.9 дэх заалтад, хэрэв бичиг баримтын зөрчилтэй зорчигчийг тээвэрлээд ирсэн бол тухайн зорчигчийг харгалзан хамгаалах зардлыг хариуцан буцаах үүргийг нь тухайн компани хүлээнэ" хэмээх заалттай.
Дээрх заалтын дагуу "Хүннү Эйр" компани харгалзах, халамжлах зардлаа хариуцна гэсэн үг. Мөн буцаах үүргийг нь хүлээнэ. Хүчин төгөлдөр бус бичиг баримттай байгаа учраас хилээр нэвтрүүлэхгүй байгаа юм. Түүнээс биш өөр ямар нэгэн шалтаг, шалтгаан байхгүй. Зөвхөн хүчин төгөлдөр бичиг баримтыг үндэслэж хилээр нэвтрүүлнэ.
Одоогоор хил дээр ирээд тав хонож байна. Тухайн иргэнийг буцаах гэхээр өөрөө буцахгүй гэж эсэргүүцэл үзүүлээд байгаа. Хүчээр суулгаж явуулах гэхээр "Хүннү Эйр"-ийнхэн нислэгийн аюулгүй байдалд саад учруулж болзошгүй эрсдэл байна хэмээн суулгахгүй байгаа юм билээ. Нисэж байх үед асуудал үүсэх вий гэсэн болгоомжлол байгаа. Тиймээс энд хүлээгдэж байна.
Холбогдох байгууллагуудад ямар мэдээлэл очсон, ямар хүсэлт тавьсан талаарх мэдээлэл бидэнд байхгүй. Одоо хил дээр саатуулагдсан байгаа гэсэн үг.
Бичиг баримтынхаа хугацааг анзаарахгүй хил дээр саатуулагддаг тохиолдол олон бий. Хүчин төгөлдөр бичиг баримтаар улсын хилээр шалгаж нэвтрүүлэх үүрэгтэй. Аль ч улсын хилийн шалган нэвтрүүлэх алба ийм журамтай" хэмээн хариуллаа.
Харин Гадаад Харилцааны Яам "Энэ хүний асуудлаар холбогдох байгууллагууд нь ярилцаж шийдээ гаргах байх" хэмээн хэлэв.
