ОХУ-ын нутаг дэвсгэрт гарсан дроны халдлагуудын дараа Украинтай залгаа хилийн харуул, хяналтыг чангатгах үүргийг ерөнхийлөгч Владимир Путин холбогдох албаныханд өгсөн байна.

Өчигдөр нэг дрон нийслэл Москва хотоос ердөө 100 км-ийн зайд осолдож унасан нь аюулын харанга дэлдсэн хэрэг байв.

ОХУ-ын баруун болон өмнөд бүс нутагт дроны хэд хэдэн халдлага гарч, сэжигтэй нисдэг биет илэрсний дараа хоёр дахь том хот Санкт-Петербургийн агаарын орон зайг хаасан юм.

Халдлагуудын улмаас хүний амь хохироогүй байна.

Москва мужийн захирагч Андрей Воробьевын мэдээлснээр нэг дрон нийслэлээс 100 км зайтай оршдог Губастово тосгоны ойролцоо унажээ.

Тэрбээр дроныг Украиных гэж шууд нэрлээгүй ч иргэний байгууламжуудад халдах зорилготой байх өндөр магадлалтайг сошиал хуудсандаа бичсэн байна.

Мэргэжилтнүүдийн мэдээлснээр ийм төрлийн дроныг Украинд үйлдвэрлэдэг бөгөөд 800 хүртэл километр зайд нисэх чадвартай гэнэ. Гэхдээ хангалттай их хэмжээний тэсрэх бодис тээвэрлэх боломжгүй юм байна.

Оросын зэвсэгт хүчин Мягмар гарагийн өглөө Брянск мужийн нутаг дэвсгэр дээр нэг дрон буудаж унагасныг бас мэдээлжээ.

Даваа гарагаас Мягмар гарагт шилжих шөнө Белгород мужийн нутагт гурван ширхэг дрон илрүүлсэн байна.

Тэдгээрийн нэг нь мужийн төв Белгород хотын нэг барилгад хөнгөн гэмтэл учруулсан ч хүний амь эрстээгүйг мужийн захирагч Вячеслав Гладков мэдээлжээ.

ОХУ-ын батлан хамгаалах яам өчигдөр Краснодар муж, түүний хөрш Адыгейд бас Украины дронуудыг илрүүлж устгаснаа мэдээлсэн юм.

Белгород, Брянск зэрэг Украинтай хил залгаа мужуудад ийм халдлага үе үе гардаг ч хилээс хол оршдог Краснодар, Адыгейн БНУ-д халдлага гарсан нь ОХУ-ын удирдагчдын санааг зовоож байна.

Батлан хамгаалах яам халдлагаас сэргийлж чадсан гэсэн ч Краснодар мужийн нутагт газрын тосны нөөцийн байгууламж дроны цохилтод өртөж, томоохон гал түймэр гарсныг хэвлэлүүд мэдээлсэн юм.

Одоогоор Киевийн эрх баригчид дээр халдлагуудыг үйлдсэнээ хүлээн зөвшөөрөөгүй байна. Өмнө нь Оросын нутгийн гүнд гарсан халдлагуудыг ч үйлдсэнээ шууд зөвшөөрч байгаагүй юм. Оросын зарим мэргэжилтнүүд үүнийг Украины тал агаарын цохилт өгөх чадвараа харуулсан хэрэг гэж үзэж байгаа бол зарим нь илүү том хэмжээний халдлагын өмнөх бэлтгэл байж болзошгүйг анхааруулжээ.

Мягмар гарагийн өглөө ОХУ-ын хэд хэдэн бүс нутагт агаарын түгшүүрийн дохио цацагдаж, радио, телевизийн нэвтрүүлгүүд тасалдсан байна.

Оросын онцгой байдлын албанаас сүүлд гаргасан мэдэгдэлд үүнийг хакеруудын үйл ажиллагаа, хуурамч дохио байсан гэж тайлбарлажээ.

Эх сурвалж: Associated Press