Дэлхийн тэргүүлэгч "Их 20"-ийн орнуудын Гадаад хэргийн сайд нарын уулзалт Дели хотноо болж байгаа бөгөөд энэ үеэр Украины нөхцөл байдал хэлэлцэх гол сэдвүүдийн нэг байх юм.

Ялангуяа дипломатууд Европ дахь дайн дэлхийн бусад орнуудад хэрхэн нөлөөлж, хөгжиж буй ядуу орнуудад ямар нэмэлт бэрхшээл тулгарч байгаа талаар ярилцах болно гэж мэдээлэв.

Дээд хэмжээний уулзалтад АНУ-ын Төрийн нарийн бичгийн дарга Энтони Блинкен, ОХУ-ын Гадаад хэргийн сайд Сергей Лавров нар хэвлэлийнхний анхаарлын төвд байна. Тэд хоёулаа өмнөх өдөр нь Делид иржээ.

Өнгөрсөн долдугаар сард Балид болсон “Их 20”-ийн дээд хэмжээний сүүлийн уулзалтын үеэр Блинкен, Лавров нар хуралдааны нэг танхимд байсан бөгөөд гэрчүүдийн хэлснээр Блинкен үг хэлэхээр гарч ирэхэд Лавров танхимаас гарч явсан гэдэг.

Тэдний сүүлчийн албан ёсны уулзалт 2022 оны нэгдүгээр сард буюу Оросууд Украин руу довтлохоос хэдхэн долоо хоногийн өмнө болж байв.

Сэтгүүлчид болон барууны дипломатууд энэ хоёр хүн Делид биеэ хэрхэн авч явахыг анхааралтай ажиглаж байна.

Энэтхэгийн урилгаар тус уулзалтад “Их 20”-д багтдаггүй хорин орны төлөөлөгчид мөн оролцож байгаа юм.

Дээд хэмжээний уулзалтын хэлэлцэх асуудлын жагсаалтад дэлхийн эдийн засгийн өсөлт, инфляци, эрчим хүч, хүнсний бүтээгдэхүүний үнийн өсөлт, түүнчлэн дэлхий даяар бараа, үйлчилгээний эрэлт буурч байгаа зэрэг асуудлууд багтжээ.

Их 20-ийн Гадаад хэргийн сайд нарын уулзалт Энэтхэгийн Бангалор хотноо болсон Их 20-ийн орнуудын Сангийн сайд болон Төв банкны төлөөлөгчдийн дээд хэмжээний уулзалтын дараа зохион байгуулагдаж байгаа нь энэ юм.

Энэ уулзалтын гол сэдэв нь Орос-Украины мөргөлдөөнд өрнөдийн болон Орос-Хятадын эвслийн хүчний тэнцвэрт байдлын талаар хэлэлцэх байсан ч оролцогчид хамтарсан мэдэгдэлд санал нэгдэж чадаагүй байна.

Эх сурвалж: Toim.mn