Сүүлийн хэдэн сарын турш дайны хамгийн халуун цэг болоод байсан Донецкийн Бахмут хотоос Украины зэвсэгт хүчин ухарч болзошгүй болжээ.

Эзгүйрч хоосорсон энэ хотыг эзлэхийн тулд Оросын арми асар их хүн хүчээ золиослон тулалдаж байгаа. “Манай зэвсэгт хүчин бүх боломжит хувилбарыг тооцоолж байгаа нь тодорхой. Одоохондоо тэд хотыг хянаж байгаа ч шаардлагатай бол стратегийн ухралт хийх болно. Бид бүх хүн хүчээ дэмий зүйлд золиослохгүй” гэж Украины ерөнхийлөгч Володимир Зеленскийн эдийн засгийн бодлогын зөвлөх Александр Роднянский өчигдөр CNN агентлагт ярьжээ.

Донецк бол ОХУ-ын хууль бусаар өөртөө нэгтгэсэн Украины дөрвөн мужийн нэг юм. Гэхдээ тус мужийн газар нутгийн талыг л хянаж байгаа. Үлдсэн талыг эзлэхийн тулд Бахмутыг авах зайлшгүй шаардлагатай.

Тиймээс Бахмутын төлөө тулаанд Оросын арми болон хувийн зэвсэгт хүчний Вагнер групп асар их хүч төвлөрүүлж, тэр хэрээрээ их хэмжээний хохирол амсаж буй гэсэн мэдээлэл бий.

Бахмутыг алдах нь Оросын талд тактикийн давуу тал үүсгэх ч дайны эцсийн хувь заяанд шийдвэрлэх үүрэг гүйцэтгэхгүй гэж ажиглагчид үзэж байна.

Лхагва гарагт Вагнер группийн тэргүүн Евгений Пригожин ухрах шинж тэмдэг Украины талаас ажиглагдахгүй байгааг хэлжээ.

“Украины арми нэмэлт хүч татаж, хотыг хяналтдаа байлгахын тулд чадах бүхнээ хийж байна. Украины олон арван мянган цэрэг хүчтэй эсэргүүцэл үзүүлж, тулаанд өдрөөс өдөрт улам их цус урсаж байна” гэж тэр мэдэгдсэн байна.

Украины батлан хамгаалахын дэд сайд Ханна Маляр нэмэлт хүч Бахмут руу илгээсэн тухай энэ долоо хоногийн эхээр мэдээлж байсан юм.

Бахмут хот одоо хагас бүслэгдэж, Оросын тал хот руу орох бүх замууд руу ширүүн довтолж байгааг Украины цэргийн шинжээч Олег Жданов ярьжээ.

Тус хот одоо бүхэлдээ балгас болж хувирсан тул “стратегийн болон тактикийн ач холбогдолгүй болсон” гэж тэр дүгнэж байна.

“Бахмутад Оросын тал маш их хүн хүчээ алдсан. Тиймээс уг хот үүргээ нэгэнт гүйцэтгэсэн гэж үзэж болно” гэж Жданов тайлбарлажээ. Оросын тал хотыг эзлэхийн тулд бүх байгууламжийг нь газрын хөрстэй тэгшилж, Украины армид хориглох, хамгаалах талбар үлдээхгүй байх харгис тактик хэрэглэж байгааг эх сурвалжууд мэдээлж байгаа юм.

Саяхан цацагдсан Бахмутыг агаараас харуулсан дроны дүрс бичлэгээс энэ бүхэн харагдаж байв.

Эх сурвалж: Associated Press