Шведийн байгаль хамгаалах хөдөлгөөний залуу идэвхтэн Грета Тунбэргийг өчигдөр Норвегийн цагдаа нар Осло хот дахь эсэргүүцлийн арга хэмжээнээс хүчээр авч явжээ.

Тэрбээр Норвегийн алслагдсан бүс нутагт салхины эрчим хүч үйлдвэрлэх турбинууд байрлуулах төслийг эсэргүүцэн Норвегийн засгийн газрын байрны гадна зохион байгуулагдсан цуглаанд оролцсон юм байна.

Эсэргүүцлийн арга хэмжээг тус бүс нутагт цаа бугын аж ахуй эрхэлдэг нутгийн уугуул Сами иргэд зохион байгуулжээ.

Цаа бугын бэлчээрийг сэргээгдэх эрчим хүчний станц байгуулахад ашиглахыг тэд эсэргүүцэж байгаа юм.

Норвегийн сангийн яамны үүдийг хааж зогссон Тунбэргийг хоёр цагдаа өргөн авч явсныг хэвлэлүүд мэдээлжээ.

Хоёрдугаар сарын 23-ны өдөр үндэсний хувцастай цөөн тооны Сами хүн эрчим хүчний яамны гадна цугларснаар эсэргүүцлийн ажиллагаа эхэлсэн юм.

Сүүлдээ цуглаанд оролцогчдын тоо нэмэгдэж, Норвегийн бусад яамдын байрны гадна үргэлжлэх болжээ.

Грета Тунбэрг өнгөрсөн Ням гарагт тэдэнтэй нэгдсэн юм байна.

100,000 орчим тоотой нүүдэлчин Сами угсаатнууд Норвеги, Швед, Финланд, ОХУ-ыг дамнасан алс умард хязгаарт тархан амьдардаг. Тэд цаа буга болон загасны аж ахуй эрхэлдэг юм.

Норвегийн дээд шүүх өнгөрсөн онд уугуул иргэдийн нутагт салхины эрчим хүч үйлдвэрлэх зорилгоор 151 турбин угсрах төслийг хууль бус гэж дүгнэж байжээ. Гэхдээ төслийн ажил үргэлжилсээр байгаа юм байна.

Норвегийн эрх баригчид өнгөрсөн хугацаанд шүүхийн шийдвэрийн дагуу арга хэмжээ авалгүй маргалдагч талуудыг зөвшилцөлд хүргэх шийдэл хайсаар байжээ.

Эх сурвалж: AFP