Хил залгаа бүс нутагт нь “террорист халдлага” үйлдсэнд Украины хорлон сүйтгэгчдийг буруутгаж байгаагаа ОХУ-ын ерөнхийлөгч Владимир Путин мэдэгджээ.
Украинтай хил залгадаг Брянск мужийн Любечане тосгонд зэвсэгт этгээдүүд энгийн иргэдийн автомашин руу гал нээсний улмаас хоёр эрэгтэй алагдаж, 10 настай хүү шархадсан тухай орон нутгийн захиргаа өчигдөр мэдэгдсэн юм.
Киевийн эрх баригчид Оросын талын мэдэгдлийг эрс няцаажээ.
Тухайлбал Украины ерөнхийлөгчийн зөвлөх Михайло Подоляк үүнийг “өдөөн хатгалгын сонгодог хэлбэр” гэж нэрлээд “тусгаар улсыг эзлэн түрэмгийлснээ зөвтгөхийн тулд ард түмнээ айлгах оролдлого” гэж сошиал хуудсандаа тайлбарлан бичсэн байна.
Өмнөх өдөр нь Украины дронууд ОХУ-ын нутаг дэвсгэрийн гүнд халдсан тухай Москвагийн эрх баригчид мэдээлж байв.
Гэхдээ Украины арми Оросын газар нутагт нэвтэрсэн тухай тодорхой мэдээлэл одоогоор алга байна.
Харин Оросын Холбооны Аюулаас Хамгаалах Албаныхан өчигдөр нутаг дэвсгэрт нь нэвтэрч, ард иргэдийг барьцаалсан Украины үндсэрхэг үзэлтнүүдтэй тулалдсан тухайгаа мэдээлжээ.
Уг мэдэгдэлд тэднийг Украины нутаг дэвсгэр рүү ухрахдаа хилийн тосгонд их хэмжээний тэсрэх бодис үлдээснийг илрүүлсэн гэсэн байна.
Пүрэв гарагт төв телевизийн сувгаар ярихдаа Путин “Өнөөдөр тэд хил орчмын нутагт нэвтрэх үеэрээ бас нэг террорист халдлага, бас нэг гэмт хэрэг үйлдэж, энгийн номхон иргэд рүү гал нээлээ. Тэд ийм үйлдлээрээ юу ч олж долоохгүй. Бид тэднийг нухчин дарах болно” гэж хэлжээ.
Өчигдөр Украинд байрладаг Оросын Сайн дурын Корпусын гишүүд гэж өөрсдийгөө нэрлэсэн хүмүүсийн дүрс бичлэг онлайн орчинд тарсан юм. Тэд өөрсдийгөө ОХУ-ын нутаг дэвсгэрт байгааг ярьж байжээ.
Зарим эх сурвалжуудын баталж буйгаар дээрх корпус нь өнгөрсөн онд Украинд байгуулагдсан бөгөөд Путиний дэглэмийн эсрэг үзэлтэй оросуудаас бүрддэг гэнэ.
Тухайлбал эрэн сурвалжлах сэтгүүлзүйн Bellingcat Monitoring бүлгийн мэргэжилтэн Майкл Колборн дүрс бичлэгт гарч буй нэг хүнийг Оросын сайн дурынхны тэргүүн Денис Капустин мөн болохыг баталжээ.
Тэд Путиний дэглэмийн эсрэг тэмцэлд эх орон нэгтнүүдээ уриалах зорилгоор Брянск мужийн нутаг дэвсгэрт орж ирснээ тайлбарласан байна.
Украины цэргийн тагнуулын албаны төлөөлөгч Андрей Юсов дээрх хүмүүсийн талаар “Тэд бол Путиний дэглэмийн эсрэг зэвсэг барин тэмцэж буй хүмүүс. Оросууд нойрноосоо сэрж, нөхцөл байдлыг ойлгоод бодитой алхам хийж эхэлсэн байж болзошгүй” гэж тайлбарлажээ.
Эх сурвалж: BBC