Атлантын далайн өмнөд хэсэгт оршдог Фолклэндийн арлуудыг Их Британи улс өөрийн газар нутаг болохыг дахин батлан илэрхийлжээ.
Их Британи, Аргентин улсууд 1982 онд эдгээр арлуудын төлөө дайтаж байсан юм. Өнгөрсөн долоо хоногт Энэтхэгт болсон Их 20-ын бүлгийн гадаад хэргийн сайд нарын уулзалтын үеэр Аргентины гадаад хэргийн сайд Сантьяго Кафиеро тус улс арлын асуудлаар хамтран ажиллах гэрээнээс гарч байгаагаа Их Британийн гадаад хэргийн сайд Жэймс Кливерлид мэдэгджээ.
Үүний хариуд Их Британийн гадаад хэргийн яам дээрх мэдэгдлийг гаргасан юм байна.
“Фолклэндийн арлууд бол Британийн газар нутаг. Арлын оршин суугчид Их Британийн хилийн чанад дахь өөртөө засах нутаг дэвсгэр хэвээр үлдэх шийдвэрээ нэгэнт гаргасан. Тэд цаашдын хувь заяагаа сонгох эрхтэй” гэж Кливерли сошиал хуудсандаа бичжээ.
Хоёр улс 2016 онд арлын асуудлуудыг шийдвэрлэхэд хамтран ажиллах гэрээг байгуулж байсан юм.
Аргентин улс дээрх гэрээнээс гарах болсныг, шинэ яриа хэлэлцээ эхлүүлэх сонирхолтой байгааг Кафиеро өнгөрсөн долоо хоногт Кливерлитэй уулзахдаа мэдэгджээ.
Аргентин улс Өмнөд Америкийн эргээс 480 км зайтай оршдог, 3,500 орчим оршин суугчтай эдгээр арлуудыг Мальвиний арлууд гэж нэрлэдэг ба олон жилийн турш өөрийн газар нутагт тооцсоор ирсэн түүхтэй.
Их Британи улс 1833 онд байлдааны хөлгөө илгээн арал дээр байрлаж байсан Аргентины цэргүүдийг хөөн гаргаж байжээ. Британичууд Фолклэндийн арлуудыг бүр 1765 оноос хойш өөрийн эзэмшил байсан гэж үздэг.
Аргентины тал 1833 оны үйл явдлыг хууль бус эзлэн түрэмгийлэл гэж үздэг юм.
1982 онд Аргентин улс арлуудад цэрэг илгээснээр хоёр сар үргэлжилсэн дайн эхэлж байжээ. Энэ дайнд Их Британийн талаас 255, Аргентины талаас 649 цэрэг амь үрэгдсэн гэдэг.
Дайны төгсгөлд Британийн арми Аргентины цэргийг арлуудаас хөөн гаргасан юм.
2013 онд болсон санал хураалтаар Фолклэндийн арлуудын оршин суугчдын олонх нь Их Британийн харьяанд үлдэх сонголт хийж байжээ.
Аргентины талын шийдвэрт сэтгэл дундуур байгаагаа Их Британийн засгийн газрын Америкийн асуудал хариуцсан сайд Дэвид Рутли саяхан илэрхийлсэн байна.
“1982 оны мөргөлдөөнд амиа алдсан хүмүүсийн ар гэрийнхний сэтгэл санааг тайтгаруулсан гэрээнээс Аргентин улс гарахаар болсонд харамсаж байна. Энэ гэрээ Аргентин, Их Британи, Фолклэндийн арлын оршин суугчдад аль алинд нь ашигтай байсан юм” гэж тэр твиттер хуудсандаа бичжээ.
Эх сурвалж: Associated Press
