Хоёр өдөр үргэлжилсэн иргэдийн ширүүн тэмцлийн дараа Гүржийн эрх баригч нам маргаан дагуулсан хуулийн төслөө буцаан татаж байгааг өчигдөр зарлажээ.
ОХУ-д үйлчилдэг хуультай ижил төстэй “гадаад агент”-ын тухай хуулийн төслийн эхний хэлэлцүүлэг Мягмар гарагт болж, парламентын гишүүдийн олонх нь дэмжсэн юм.
Энэ хуулийн дагуу үйл ажиллагааных нь зардлын 20-оос багагүй хувь гадаад орнуудаас санхүүждэг төрийн бус байгууллагууд, хэвлэл мэдээллийн хэрэгслүүд эрх баригчдын онцгой хараа хяналтад орохоор байв.
“Орос маягийн хууль”-ыг эсэргүүцсэн иргэд Мягмар, Лхагва гарагуудад нийслэл Тбилиси хотод жагсаал цуглаан зохион байгуулж, цагдаа нартай тулгарсан юм.
Эрх баригч Гүржийн Мөрөөдөл нам нийгмийн тогтвортой байдлыг хангах үүднээс хуулийн төслөө ямар нэг нөхцөлгүйгээр буцаан татаж байгаагаа өчигдөр зарлажээ.
Тус улс дахь Европын Холбооны элч төлөөлөгч шийдвэрийг талархан хүлээж авснаа мэдэгдээд нийгэм, улс төрийн шинэчлэлээ үргэлжлүүлэхийг эрх баригчдад уриалсан байна.
Гүрж улс нь Европын Холбооны гишүүн болох хүсэлтээ гаргаснаас гадна НАТО-д элсэх сонирхолтой байгаа.
Хэрвээ дээрх хууль батлагдвал Европтой ойртох үйл явцад саад учрах байв.
Жагсаал цуглааны үеэр баривчлагдсан хүмүүсийг сулласан талаар Гүржийн дотоод хэргийн яам мэдэгдсэн байна. Гүржийн ерөнхийлөгч Саломе Зурабишвили хуулийн төслийг эсэргүүцэн тэмцсэн иргэдэд талархал илэрхийлжээ.
“Эхний ялалтаа байгуулсан ард иргэддээ баяр хүргэмээр байна. Дуу хоолойгоо эрх баригчдад хүргэж чадсан хүмүүсээр би бахархаж байна. Европтой нийлэх замд маань засгийн газарт үл итгэх байдал саад болж байлаа” гэж тэр телевизээр иргэддээ хандан хэлсэн юм.
ОХУ-ын хувьд 2012 онд “гадаад агент”-ын тухай хуультай болсон бөгөөд үүнийгээ сөрөг хүчний дуу хоолойг дарах хэрэгсэл болгон ашигладаг гэж ажиглагчид үздэг.
Кремлийн хэвлэлийн төлөөлөгч Дмитрий Песковоос сэтгүүлчид Гүржид болж буй үйл явдлын талаар асуухад ОХУ дээрх хуулийн төсөлтэй ямар ч холбоогүйг мэдэгджээ.
Тэрбээр Гүржид өрнөж буй жагсаал цуглаанаас хол байхыг тэнд оршин суугаа ОХУ-ын иргэдэд анхааруулсан байна.
Хэдийгээр хуулийн төслийг буцаасан ч Гүржийн сөрөг хүчний намууд тэмцлээ зогсоох төлөвлөгөөгүй байгаагаа мэдэгджээ.
Тэд хуулийн төслийг буцааж татах үйл явц ямар замаар хэрэгжих талаар илүү дэлгэрэнгүй мэдээлэл өгөх, баривчлагдсан бүх жагсагчдыг суллахыг эрх баригчдаас шаардаж байна.
Эх сурвалж: BBC
