Пүрэв гарагийн өглөө Оросын арми Украины хотууд руу агаараас довтлохдоо зургаан ширхэг дуунаас хурдан пуужин хэрэглэжээ.

Сүүлийн гурван долоо хоног орчим хугацаанд Оросын тал агаарын цохилтоо завсарлаад байсан юм.

Өчигдрийн довтолгооны үеэр Украины 10 бүс нутагт дэд бүтэц, иргэний байгууламжууд сүйдэж, хамгийн цөөндөө зургаан хүн амь үрэгдсэн байна. Фронтын шугамаас 700 км зайтай оршдог Львов муж энэ удаагийн агаарын цохилтод өртсөн Украины хамгийн баруун захын бүс нутаг болжээ.

“Эзлэн түрэмгийлэгчид зөвхөн энгийн номхон иргэдийг алж чадна. Тэдний чадах ганц зүйл энэ. Гэхдээ ингээд нэмэргүй. Тэд хийсэн бүх үйлдлийнхээ хариуцлагаас мултрахгүй” гэж Украины ерөнхийлөгч Володимир Зеленский мэдэгдсэн байна.

Өчигдөр Оросын талаас зургаан ширхэг Кинжал дуунаас хурдан пуужин харвасныг Украины албаныхан мэдээлжээ. Ийм зэвсгийг амдаж устгах техникийн боломж Украинд байхгүй юм. Украины дайны туршид Оросын арми ийм олон тооны дуунаас хурдан пуужин хэрэглэж байгаагүй.

ОХУ-ын ерөнхийлөгч Владимир Путин дуунаас хурдан пуужингаараа байнга гайхуулдаг ч тус улсын зэвсгийн нөөцөд төдийлөн олон биш, хэдэн арван ширхэг бий гэж судлаачид үздэг.

Өчигдрийн довтолгоонд Европ тивийн хамгийн том атомын цахилгаан станц гэгддэг Запорожийн станцын эрчим хүчний шугам гэмтэж, нөөцийн дизель генераторт холбогдсон байна.

Үдээс хойш тасалдсан шугамыг сэргээн холбож, хэвийн горимд оруулснаа Украины эрчим хүчний түгээлтийн Укэнерго компаниас мэдээлжээ.

НҮБ-ын цөмийн эрчим хүчний агентлагийн тэргүүн Рафаэл Гросси станцын ойр орчмыг хамгаалалтад авахыг талуудад дахин уриалсан байна.

“Бид энэ болгонд шоо хаян азаа үзэж байгаагаа ойлгох хэрэгтэй. Цаашид энэ хэвээр үргэлжилбэл нэг л өдөр биднийг аз хаях болно” гэж тэр анхааруулжээ.

Украины зэвсэгт хүчнээс гаргасан мэдэгдэлд өгүүлснээр Пүрэв гарагт Оросын талаас төрөл бүрийн нийт 81 пуужин харвасан байна.

Тэдгээрийн заримыг байлдааны нисэх онгоцноос, заримыг Хар тэнгис дэх хөлөг онгоцноос харважээ. Украины агаараас хамгаалах хүч 34 далавчит пуужин болон дөрвөн дроныг устгаж чадсан байна.

“Харамсалтай нь Кинжал төрлийн пуужингуудыг зогсоох боломжгүй байсан тул манай дэд бүтцийн байгууламжууд цохилтод өртлөө” гэж Киевийн тойргийн цэргийн командлагч Сергей Попко мэдэгдсэн юм.

Энэ удаагийн агаарын цохилтыг ОХУ-ын батлан хамгаалах яам өнгөрсөн долоо хоногт Брянск мужид гарсан террорист халдлагын хариу арга хэмжээ гэж тайлбарлажээ.

Эх сурвалж: Associated Press