Сүүлийн үед Африк тивээс Газар дундын тэнгис гатлан ирэх дүрвэгчдийн тоо өсөх болсон нь Оросын Вагнер группийн хэрэгжүүлж буй “гибрид дайн”-ы үр дүн гэж үзэж байгаагаа Италийн засгийн газар мэдэгджээ.
Өөрөөр хэлбэл Африкийн орнуудад зориуд тогтворгүй байдал үүсгэж, эх орноосоо дүрвэх хүмүүсийн тоог нэмэгдүүлж байгаа нь Украиныг дэмжсэн Европын орнуудыг шийтгэх зорилготой Москвагийн эрх баригчдын бодлого гэж үзэж байгаа юм байна.
“Африкийн эргээс нүүдэллэх хүмүүсийн тооны эрчимтэй өсөлт нь тус тивийн орнуудад Вагнерын хэрэгжүүлж буй гибрид дайны стратегийн нэг хэсэг гэж хэлж болохоор байна” гэж Италийн батлан хамгаалахын сайд Гуйдо Кросетто өчигдөр хэлжээ.
Энэ он гарсаар Италид 20,000 орчим дүрвэгч ирсэн нь 2022 оны мөн үеийн 6,100 орчмоос огцом өссөн үзүүлэлт юм.
Кросеттогийн мэдэгдэлд Вагнер группийн босс Евгений Пригожин тэр дор нь хариулжээ.
“Дүрвэгчдийн хямрал ямар байдалтай байгаа талаар бидэнд ямар ч мэдээлэл алга. Энэ бол бидэнд хамаагүй асуудал” гэж тэр Телеграм сувгаараа ярьсан байна.
Дараа нь тэр Кросеттог элдэв үгээр шүүмжилж, улс орныхоо дотоод асуудалд илүү анхаарал хандуулахыг зөвлөсөн юм.
Хувийн зэвсэгт хүчний Вагнер группийн анги нэгтгэлүүд Ливи, Мали, Төв Африкийн Бүгд Найрамдах Улс зэрэг Африк тивийн хэд хэдэн оронд үйл ажиллагаа явуулдаг гэдэг.
Ерөнхий сайд Жоржиа Мелонигийн Италийн Ахан дүүс намын удирдагчдын нэг Кросетто өчигдөр хэлсэн үгэндээ дүрвэгчдийн асуудлыг шийдвэрлэхэд туслахыг НАТО-гийн холбоотнуудад уриалжээ.
“Хамтын эрсдэлийг хуваалцаж чадах нь Умард Атлантын эвслийг илүү хүчирхэг болгох ач холбогдолтой. Харин эрсдэлийг илүү их үүрч буй гишүүн орнуудаа ганцаар үлдээвэл эвсэл задрах аюултай” гэж тэр хэлсэн байна.
Израилд хийсэн айлчлалынхаа үеэр Италийн гадаад хэргийн сайд Антонио Таяни бас Вагнерын үйл ажиллагаа явуулж буй орнуудаас ирэх дүрвэгчдийн тоо нэмэгдэж буйд санаа зовж байгаагаа ANSA агентлагт ярьсан юм.
Өнгөрсөн сард Италийн Калабриа мужийн эргийн ойролцоо хууль бус дүрвэгчдийг тээвэрлэсэн хөлөг шатах үеэр 79 хүн амь үрэгдэж байв. Италийн засгийн газар энэ үеэр шуурхай аврах арга хэмжээ авч чадаагүйд буруутгагдаж байлаа.
Эх сурвалж: Reuters