Мягмар гарагт Хар тэнгисийн дээр олон улсын агаарын орон зайд АНУ-ын тагнуулын дрон ОХУ-ын сөнөөгч онгоцтой тулгарсан билээ.

Үүний улмаас гэмтсэн MQ-9 Reaper дрон тэнгисийн усанд унасан юм.

Оросын тал дронд шууд нөлөөлөөгүй, дрон өөрөө “огцом маневр” хийх үедээ унасан гэж тайлбарлаж байгаа. Харин АНУ-ын тал Су-27 сөнөөгч онгоц дроныг мөргөж гэмтээснээс унасан гэж мэдэгдэж байв.

Тэгвэл өчигдөр АНУ-ын зэвсэгт хүчин агаарт болсон үйл явдлын дроны камераар авсан бичлэгийг нийтэд дэлгэжээ. Эндээс АНУ-ын тайлбар үнэн болох нь харагдаж байгаа юм.

Эхлээд Оросын Су-27 сөнөөгч дроны урд замд шатахуунаа цацсан байна. АНУ-ын мэргэжилтнүүд үүнийг нислэгт саад учруулах гэсэн урьд өмнө харж байгаагүй сонин тактик гэж дүгнэжээ.

Су-27 хоёр дахь удаагаа дронд ойртох үеэр дүрс бичлэг хэсэг хугацаанд тасалдсан нь мөргөлдөөн болсноос шалтгаалсан бололтой.

Дүрс дахин сэргэх үед дроны нэг сэнс муруйж нугарсан нь тод харагдаж байгаа юм. Энэ нь дроны унах шалтгаан болсон байна.

Оросын тал Хар тэнгист унасан дроны үлдэгдлийг олж авахаар ажиллаж байгаагаа мэдэгдсэн билээ

Харин АНУ-ын албаныхан дроноос нууц мэдээлэл алдагдах эрстлийг эрс багасгасан тул үүнд санаа зовохгүй байгаагаа илэрхийлсэн юм.

Сүүлийн хоёр долоо хоногийн хугацаанд Оросын байлдааны нисэх онгоцнууд Сири дэх АНУ-ын цэргийн баазын эсрэг илт түрэмгий, өдөөн хатгасан үйлдэл гаргах болсныг өчигдөр АНУ-ын цэргийн төв тойргийн командлагч, генерал Эрик Курилла видео дүрсийг танилцуулах үеэрээ мэдэгджээ.

“Сүүлийн үед Оросын агаарын зэвсэгт хүчнийхэн энэ бүс нутагт мэргэжлийн бус, аюултай үйлдэл гаргах нь мэдэгдэхүйц нэмэгдсэн. Гуравдугаар сарын 1-нээс хойш ийм үйлдэл өссөнийг бид ажиглаж байгаа” гэж тэр хэлсэн байна.

Нэг бүр нь $32 саяын үнэтэй MQ-9 Reaper бол 11 метрийн урт, далавчийг нь оруулбал 22 метрийн өргөн биетэй алсаас жолоодогддог нисгэгчгүй онгоц юм.

АНУ-ын зэвсэгт хүчин үүнийг ихэвчлэн тагнуулын зорилгоор ашигладаг ба шаардлагатай тохиолдолд зэвсэглэж, агаарын цохилтод ашигладаг байна.

Эх сурвалж: The Guardian