UBS банк үйл ажиллагаа нь доголдсон Швейцарын Credit Suisse банкийг $3.2 тэрбумаар худалдаж авахаар тохиролцжээ.

Тохиролцоонд бас Швейцарын төв банкнаас $108 тэрбумын тусламж авах нөхцөл тусгагдсан байна.

167 жилийн настай Credit Suisse нь АНУ-аас эхлэлтэй банкны хямралд өртсөн хамгийн том банк болж байгаа.

АНУ-ын засаг захиргаа Silicon Valley Bank, Signature Bank банкуудыг аврах арга хэмжээг өнгөрсөн долоо хоногт эхлүүлж, нийтдээ $54 тэрбумын санхүүгийн тусламж үзүүлэхээр болсон юм.

“UBS банк Credit Suisse банкийг авсан нь Швейцарын эдийн засгийг хамгаалж, санхүүгийн аюулгүй байдлыг баталгаажуулах чухал шийдэл болж байна” гэж Швейцарын төв банкнаас мэдэгджээ.

UBS, Credit Suisse аль аль нь дэлхийн эдийн засгийн тогтвортой байдлын баталгаа болдог системийн чухал ач холбогдолтой гол 30 банкны нэг юм.

Хэрвээ Credit Suisse дампуурвал дэлхий нийтийг хамарсан санхүүгийн хямрал эхлэх байв. Хоёр банкны санхүүгийн үзүүлэлтүүд нэлээд ялгаатай байгаа.

UBS банк өнгөрсөн онд $7.6 тэрбумын ашигтай ажилласан бол Credit Suisse $7.9 тэрбумын алдагдалтай ажиллажээ.

Credit Suisse банкны хувьцааны ханш сүүлийн нэг жилийн хугацаанд 74 хувиар унасан бол UBS банкных харьцангуй тогтвортой байгаа.

АНУ, Европын Холбоо, Их Британийн эрх баригчид банкнуудын тохиролцоог талархан хүлээж авч буйгаа илэрхийлцгээж, дэлхийн банк санхүүгийн системийг уналтаас хамгаалах бүх арга хэмжээг авч ажиллахаа мэдэгджээ.

Эх сурвалж: Reuters