Герман улсын хууль зүйн сайд Марко Бушман
Баасан гарагт Нидерландын Гааг хотод оршдог Олон Улсын Эрүүгийн Шүүх дайны гэмт хэрэгтэй холбогдуулан ОХУ-ын ерөнхийлөгч Владимир Путинийг баривчлах шийдвэр гаргасан билээ.
Тус шүүх өмнө нь Суданы дарангуйлагч Омар аль-Башир, Ливийн дарангуйлагч Муаммар Каддафи нарыг баривчлах шийдвэр гаргаж байсан юм.
Олон Улсын Эрүүгийн Шүүхийн гишүүн 123 улсаас хамгийн түрүүнд Герман улс шийдвэрийг гүйцэтгэхэд бэлэн байгаагаа илэрхийлжээ.
Шүүхийн шийдвэрийг зарласны маргааш Германы хууль зүйн сайд Марко Бушман нутаг дэвсгэрт нь хөл тавьсан тохиолдолд Путин болон түүний холбоотныг баривчлахаа мэдэгдсэн тухай Bild сонин Бямба гарагт мэдээлсэн байна.
“Олон Улсын Эрүүгийн Шүүх удахгүй Интерпол болон гишүүн орнууддаа шийдвэрийг хэрэгжүүлэх чиглэл өгнө гэдэгт би найдаж байна” гэж Бушман ярьжээ.
Дайн эхэлснээс хойш Украины эзлэгдсэн нутаг дэвсгэрээс хамгийн цөөндөө 16,000 орчим хүүхдийг хүчээр ОХУ руу нүүлгэн шилжүүлсэн гэх хэрэгтэй холбогдуулан дээрх шийдвэрийг гаргасан юм. Тэднээс ердөө 125 нь буцаж ирсэн гэсэн тоо бий.
Украины ерөнхийлөгч Володимир Зеленский бодит тоо үүнээс хавьгүй их байх магадлалтайг хэлж байв.
Олон Улсын Эрүүгийн Шүүх бас Оросын хүүхдийн эрхийг хамгаалах байгууллагын тэргүүн Мария Львова-Беловаг дээрх хэрэгтэй холбогдуулан баривчлах шийдвэр гаргасан юм.
Германы хууль зүйн сайдын хийсэн мэдэгдлийн хууль, эрх зүйн үндэслэлийг судлах даалгаврыг Оросын Мөрдөн Байцаах Товчооны тэргүүн Александр Бастрыкин холбогдох албаныханд өгсөн тухай ТАСС агентлаг Ням гарагт мэдээлжээ.
Эх сурвалж: AFP