Оросын хувийн зэвсэгт хүчний Вагнер Группийн тэргүүн Евгений Пригожин өчигдөр ОХУ-ын батлан хамгаалахын сайд Сергей Шойгуд бичсэн захидлаа олон нийтэд дэлгэсэн нь ховор үзэгдэл байлаа.
Уг захидалд өгүүлснээр Украины зэвсэгт хүчин энэ сарын сүүл, ирэх сарын эхээр өргөн хэмжээний дайралт эхлэхээр төлөвлөж байгаа гэнэ.
“Вагнер хувийн зэвсэгт хүчний компанийг Оросын армийн үндсэн хүчнээс таслахгүйн тулд шаардлагатай бүх арга хэмжээг авахыг би танаас хүсэж байна. Энэ нь цэргийн тусгай ажиллагааг сөрөг үр дагаварт хүргэх болно” гэж Пригожин захидалдаа бичжээ.
Тэрбээр дайны турш ОХУ-ын батлан хамгаалах яамны удирдлагуудыг байнга шүүмжилж байсан бөгөөд сайдад бичсэн захидлаа анх удаа нийтэд ил болгосон нь энэ юм.
Энэ алхмыг хоёр зорилготой байж магадгүй гэж ажиглагчид үзэж байна.
Нэгдүгээрт, Украины армийн командлагчдыг төөрөгдүүлэх, хоёрдугаарт, хэрвээ Украины арми амжилттай довтолж чадвал бурууг Шойгуд тохох юм.
Украины талын төлөвлөгөө болон өөрийн хариу арга хэмжээний саналын дэлгэрэнгүйг нийтэд ил болголгүйгээр захидалдаа хавсаргасныг Пригожин мэдэгджээ.
Ингэхдээ тэр Украины төлөвлөгөөний талаар яаж мэдсэнээ дурдаагүй байна.
Захидалдаа тэр бас өнгөрсөн оны зунаас хойш эзлэхийн төлөө тулалдаж буй Бахмут хотын 70 орчим хувийг хяналтдаа аваад байгааг мэдээлжээ.
Пригожин захидлаасаа тусдаа өөрийн албан ёсны Телеграм сувагт өчигдөр бичихдээ Украины арми Оросын өмнөд бүсийн Белгород хот руу довтлох өндөр магадлалтайг анхааруулсан байна.
Сүүлийн үед Оросын тал хил орчмын хотуудад нь агаараас халдлага зохион байгуулсанд Украины зэвсэгт хүчнийг байнга буруутгаж байгаа. Харин Киевийн эрх баригчид аль ч халдлагыг үйлдсэнээ албан ёсоор хүлээн зөвшөөрөөгүй юм.
Эх сурвалж: Reuters
