Даваа гарагт Брюссель хотод Европын Холбооны хэсэг гишүүн орон Украинд хоёр тэрбум еврогийн үнэ бүхий зэвсэг илгээхээр санал нэгджээ.

Өөрөөр хэлбэл энэ нь нэг жилийн хугацаанд нэг сая их бууны сум нийлүүлэх төлөвлөгөө юм байна.

Энэ онд Оросын армийн дайралтыг тогтоон бариад сөрөг довтолгоонд орохын тулд сар бүр 350,000 их бууны сум хэрэгтэй байгааг Украины тал өмнө нь Европын Холбоонд мэдэгдэж байжээ.

Украины гадаад хэргийн сайд Дмитро Кулеба дээрх шийдвэрийг ”нөхцөл байдлыг эрс өөрчлөх” алхам хэмээн сайшаасан байна.

Сүүлийн үед Украины зэвсэгт хүчин Бахмут хотын орчим, эсвэл өмнөд фронтоор томоохон сөрөг довтолгоо эхлүүлж магадгүй гэсэн яриа гараад байгаа. Харин эсрэгээрээ Оросын талын довтолгооны оргил үе өнгөрөх цаг ойртож байж болзошгүй гэж Өрнөдийн шинжээчид дүгнэж байна.

Өчигдрийн тохиролцоонд Европын Холбооны 17 гишүүн улсаас гадна Норвеги улс нэгджээ.

Төлөвлөгөөний эхний шатанд нэг тэрбум еврогийн сумыг тохиролцсон улсууд дундаасаа бүрдүүлж, тавдугаар сарын сүүл гэхэд Украинд нийлүүлэхээр болсон байна. Үлдсэн хэсгийг оны хоёрдугаар хагаст нийлүүлэх юм. Сумны зарим хэсгийг бэлэн байгаа нөөцөөсөө, зарим хэсгийг үйлдвэрлэгчдэд захиалах юм байна.

Украинд зэвсэг нийлүүлэхийг эсэргүүцдэг, Оросын эсрэг хоригт саад хийхээр сүрдүүлдэг Унгар улс өчигдрийн санал хураалтад оролцохоос түдгэлзжээ.

Гэхдээ тус улсын гадаад хэргийн сайд Петер Сияарто бусад гишүүн улсуудын үйл хэрэгт саад болохгүйгээ мэдэгдсэн байна.

Норвеги улсын эрх баригчид найман ширхэг Германы Leopard 2 танкийг Украинд илгээснээ энэ үеэр зарласан юм.

Өчигдөр бас АНУ-ын засаг захиргаа $350 саяын зэвсгийн тусламжийг Украинд нэмж илгээхээр болсныг төрийн нарийн бичгийн дарга Энтони Блинкен мэдэгдсэн байна. Үүнд Himars системийн пуужингууд, 155 мм-ийн их бууны сумнууд багтаж байгаа ажээ.

Эх сурвалж: BBC