Ням гарагт ОХУ-ын ерөнхийлөгч Владимир Путин төв телевизийнхээ сувгаар өнгөрсөн долоо хоногт Хятадын төрийн тэргүүний тус улсад хийсэн айлчлалын талаар ярьжээ.
Энэ үеэр тэр Орос улс Хятадтай цэргийн эвсэл байгуулаагүйг баталсан байна.
“Бид Хятад улстай ямар нэг цэргийн эвсэл байгуулаагүй. Тиймээ, бид батлан хамгаалах салбарт хамтарч ажилладаг. Бүх зүйл нээлттэй, үүнд нуух юм байхгүй” гэж Путин ярьжээ.
Ши Жиньпиний айлчлалын өмнө Хятад улс ОХУ-д зэр зэвсэг нийлүүлж эхэлбэл ноцтой үр дагавар амсахыг Өрнөдийн орнууд анхааруулж байсан юм.
Үүнээс гадна Ши Жиньпиний айлчлалын дараа Орос улсын эдийн засаг Хятадаас хэт хамааралтай болсон гэх яриа нийтийн дунд тархаад байгаа билээ. Энэ талаар Путин өчигдөр бас байр сууриа илэрхийлжээ.
Үүнийг тэр хоёр улсын түншлэлд "атаархсан хүмүүсийн гаргасан яриа" гэж тайлбарласан юм.
“Олон арван жилийн турш Хятад улсыг Зөвлөлт Холбоот Улс болон Орос улстай хагаралдуулах гэсэн сонирхол байсаар ирсэн. Бид ямар дэлхий ертөнцөд амьдарч байгаагаа ойлгож байна. Сүүлийн жилүүдэд хүрсэн манай хоёр улсын харилцааны түвшнийг бид өндрөөр үнэлдэг” гэж Путин энэ үеэр хэлсэн юм.
Ярилцлагынхаа үеэр Путин бас 1930-аад оны үеийн нацист Герман, фашист Итали, милитарист Японы цэргийн эвсэлтэй өнөөдрийн Өрнөдийн орнуудын байгуулж буй эвслийг адилтгасан байна.
Өрнөдийн түрэмгийллийг няцаахын тулд Украинд “цэргийн тусгай ажиллагаа” явуулах болсноо тэр тайлбарлажээ.
Эх сурвалж: Reuters
