Удаан хүлээгдсэн Германы танкууд Украинд ирснийг Берлиний эрх баригчид өчигдөр баталжээ.
Энэ оны нэгдүгээр сарын сүүлээр Герман улс 14 ширхэг Leopard 2 танкийг Украинд нийлүүлэх шийдвэрээ зарлаж байсан юм. Сүүлд энэ тоо 18 болж нэмэгджээ.
Мөн Европын бусад улсуудад Leopard 2 танкийг реэкспортлох зөвшөөрөл өгсөн юм. АНУ-ын засаг захиргаа бас өөрийн үйлдвэрийн 31 ширхэг M1A2 Abrams танкийг Украинд нийлүүлэх шийдвэр гаргаж байв.
Португал улс гурав, Швед улс 10 ширхэг Leopard 2 танк илгээхээр болсон бол Польш улс Leopard 2 танкийн A4 хэмээх хуучин загварын нэг батальоныг илгээхээр болсон юм.
“Амласан ёсоор бид танкуудаа цаг хугацаанд нь Украины талд хүлээлгэж өглөө. Эдгээр танкууд фронтын нөхцөл байдлын өөрчилж чадна гэдэгт би итгэлтэй байна” гэж Германы батлан хамгаалахын сайд Борис Писториус өчигдөр мэдэгджээ.
Танкуудыг өнгөрсөн долоо хоногийн сүүлээр Украинд хилээр нэвтрүүлсэн байна. Тэдгээртэй хамт явган цэргийн хуягт машин Marder 40 ширхэг, танк чирэгч машин хоёр ширхгийг нийлүүлжээ.
Аюулгүй байдлыг хангах үүднээс Германы эрх баригчид танкуудыг аль чиглэлийн замаар Украинд нийлүүлсэн талаар мэдээлэл өгөхөөс татгалзсан байна.
Украины арми Зөвлөлтийн үед болон Зөвлөлт задарсны дараа үед үйлдвэрлэгдсэн цөөн тооны танктай. Оросын армийн эсрэг сөрөг довтолгоонд танк чухал хэрэгцээтэй байгаа ба нэн тэргүүнд Германд үйлдвэрлэсэн Leopard 2 танк яригдаж байв.
Учир нь энэ танк цагт 68 км хурдалдаг, шатахуун зарцуулалт бага, бартаат зам дээрээс өндөр нарийвчлалтай буудах чадвартай тул НАТО-гийн гишүүн орнуудын зэвсэглэлд хамгийн их байдаг. Европын орнуудын нөөцөд нийт 2,000 орчим ийм танк бий.
1970-аад оны үед гаргасан зургийн дагуу үйлдвэрлэгдсэн Leopard 2 танкийг 120 мм-ийн их буу, 7.62 мм-ийн пулемётоор зэвсэглэсэн байдаг.
Энэхүү танкийн бие бүрэлдэхүүн командлагч, бууч, цэнэглэгч, жолооч гэсэн дөрвөн хүнээс бүрддэг байна.
Өнгөрсөн хоёр сарын хугацаанд Украины цэргүүдийг Германы Доод Саксон мужийн Мюнстер дэхь Бундесвейрийн бэлтгэлийн талбайд сургасан юм.
“Украины цэргүүд сургалтын үеэр гайхалтай урам зоригтойгоо нотлоод зогсохгүй шинэ технологийг түргэн эзэмшдэгээ харууллаа” гэж Бундесвейрийн командлагч Бёрн Шульц хэвлэлд ярьжээ.
Leopard 2 танкаас гадна Их Британийн илгээсэн Challenger 2 танкуудыг хүлээж авснаа Украины батлан хамгаалах яам баталсан юм.
Украины батлан хамгаалахын сайд Олексий Резников саяхан Фэйсбүүк хуудсандаа Challenger 2 танкийн зургийг нийтлээд Британид үйлдвэрлэсэн техникийг цэрэг дайны урлагийн гайхалтай бүтээл хэмээн магтжээ.
Эх сурвалж: The Guardian
