Украины ерөнхийлөгч Володимир Зеленский өчигдөр Ассошэйтэд Пресс агентлагт дэлгэрэнгүй ярилцлага өгчээ.

Украины дайны хамгийн халуун цэг болоод байгаа Донбассын Бахмут хотыг Оросын талд алдвал ерөнхийлөгч Путинд давуу байдал үүсэхийг тэрбээр анхааруулсан байна.

“Хэрвээ тэр цусны үнэр авах юм бол, өөрөөр хэлбэл биднийг сул дорой гэсэн ойлголттой болбол түрэмгийллээ улам эрчимжүүлэх аюултай” гэж Зеленский энэ үеэр хэлжээ.

Энэ ялалт нь Путиний хувьд Хятадад, Иранд төдийгүй Өрнөдийн орнуудад хүч нөлөөгөө харуулах ач холбогдолтойг тэр анхааруулсан байна.

Бахмут хотын төлөө тулаан долоон сарын турш үргэлжилж, талуудын аль аль нь асар их хохирол амсаж байгаа.

Өрнөдийн цэргийн мэргэжилтнүүд тус хотыг алдах нь тактикийн хувьд ач холбогдол багатай гэж үзэж байгаа юм. Харин Зеленский энэ хотыг алдах нь дайсанд улс төрийн, суртал нэвтрүүлгийн давуу тал олгох эрсдэлтэй гэж дүгнэжээ.

Мөн олон улсын зүгээс болон дотоодоос Оростой зөвшилцөхийг тулгасан дарамт өөрт нь ирж болзошгүйг Зеленский хэлсэн байна.

Тэрбээр бас ярилцлагадаа Хятадын төрийн тэргүүн Ши Жиньпинийг эх орондоо урьж байгааг мэдэгджээ.

“Бид түүнийг хүлээж авахад бэлэн байна. Би түүнтэй ярилцмаар байна. Дайн эхлэхээс өмнө бид холбоотой байсан. Харин сүүлийн жил гаруй хугацаанд ганц ч удаа холбоо барьж чадсангүй” гэж Зеленский ярьсан байна.

Өчигдөр сэтгүүлчид Хятадын гадаад хэргийн яамны хэвлэлийн төлөөлөгч Мао Нинээс урилгыг хүлээж авах боломжтой эсэхийг асуухад “энэ талаар өгөх мэдээлэл одоогоор алга” гэж хариулжээ. Гэхдээ тэр Хятадын засгийн газар Украиныг оролцуулаад бүх талтай хэлхээ холбоогоо хадгалахыг эрмэлзэж буйг батлан илэрхийлсэн юм.

Кремлийн хэвлэлийн төлөөлөгч Дмитрий Песковоос энэ талаар асуухад “Хятадын төрийн тэргүүн хэнтэй харилцаа холбоо тогтоохоо өөрөө шийддэг” тул түүнд зөвлөх боломжгүйг мэдэгджээ.

Украины хямралын асуудалд Хятад улсын баримталж буй “тэнцвэртэй байр суурь”-ийг Оросын эрх баригчид өндрөөр үнэлдгийг тэр энэ үеэр илэрхийлсэн байна.

Эх сурвалж: Associated Press