Монгол Улсын Ерөнхийлөгч асан Цахиагийн Элбэгдорж гуравдугаар сарын 26-нд Киевд мужид очжээ. Энэ үеэрээ тэрбээр Украины 24 Канал телевизэд ярилцлага өгсөн байна. 24 Канал сувагт өгсөн ярилцлагадаа тэрбээр хүмүүнлэгийн зорилгоор, дайны аймшгийг нүдээр харахын тулд Украинд ирсэн хэмээн ярьжээ.

"Мянга сонсохоор нэг үз гэж монголчууд ярьдаг. Тиймээс энэ бүхнийг харахын тулд би Украинд ирсэн" хэмээн Ц.Элбэгдорж өгүүлжээ.

Буча, Ирпень зэрэг хотуудад очоод, нөхцөл байдлыг нүдээрээ харж ихээхэн цохирдсон хэмээн тэрбээр сэтгүүлчдэд ярьсан байна.

"Би Буча, Ирпень, Гостомель зэрэг дайнд өртсөн хотуудад очоод ихээхэн цочирдсон. Гал түймрийн утаа, дайныг мэдэрсэн, энэ дайн хор уршгийг биеэрээ мэдэрсэн, саяхныг хүртэл ийм дайн маш хол байлаа шүү дээ" хэмээн Ц.Элбэгдорж өгүүлсэн байна.

Түүнчлэн хүмүүс маш богино хугацаанд байшин барилгаа сэргээн босгож, хэвийн амьдрал эргүүлэн авчрахыг хичээж байгаа нь ихээхэн гайхшруулсан хэмээн тэрбээр сэтгүүлчтэй ярилцах үеэрээ онцолжээ.

"Хүмүүс барилга байшингаа засаж, сүйрсэн амьдралаа хамтдаа босгохоор хичээж байгаа нь намайг үнэхээр гайхшрууллаа. Хэн гэдэг нь тогтоогдоогүй хүмүүсийн цогцосыг зөвхөн дугаарлан оршуулсан газарт би очсон. Энэ дугааруудын ард хүний алдагдсан амьдрал, хэн нэгний эцэг эх, ах дүү байгаа. Энэ бол үнэхээр зүрх зүсэм" хэмээн Ц.Элбэгдорж онцолжээ.

Мөн "дайн маш ойрхон, ийм аймшгаас зайлсхийх ёстой, үүний зэрэгцээ Украин ч дэлхий ч энэ бүхнийг мартах ёсгүй" гэсэн нэг л дүгнэлтийг хийсэн талаар тэрбээр өгүүлсэн байна. Оросуудын үйлдсэн аймшигт үйлдлийг хэзээ ч мартаж болохгүй гэж Ц.Элбэгдорж онцолжээ.

"Дэлхийн II дайнаас хойш олон жил өнгөрсөн, гэхдээ хүмүүс одоо хүртэл Холокостын аймшигт үеийн талаар ярьдаг. Одоо Украинд болж буй үйл явдал XXI зууны Холокост" хэмээн Ц.Элбэгдорж 24Канал сувагт өгсөн ярилцлагадаа өгүүлсэн байна.

Мөн энэ ярилцлагадаа тэрбээр буриадууд цэргийн албанд ихээр татагдаж, байлдааны талбарт амиа алдаж байгаа талаарх сэдвийг ч хөнджээ. Буриадууд зэрэг үндэсний цөөнхүүд олноор татагдаж, амиа алдаж байгаа явдлыг Ц.Элбэгдорж "угсаатны цэвэрлэгээ" хэмээн нэрлэсэн байна.

"Кремль угсаатны цөөнхүүдийг бамбай болгон ашиглаж байна. Путин Орост хэсэгчилсэн дайчилгаа зарлахад Москва, Санкт-Петербург зэрэг томоохон хотуудад энэ дайчилгааг мэдрээгүй байх. Харин алслагдсан бүс нутгуудад энэ дайчилгааг албадан хийсэн, хэнээс ч юу ч асуугаагүй, явах шаардлагатай, яв л гэсэн. Энэ алслагдсан нутгууд тун ядуу, тиймээс л нөхөр, хөвгүүдээ Украины дайн руу явуулсан. Украинд хийсэн, амиа алдсан оросуудын талаарх статистик мэдээлэлд байгаа хүмүүсийн ихэнх нь буриад, тува, халимаг гээд үндэсний цөөнхийн төлөөллүүд байна. Тэд бол гарал угсаагаараа монголчууд, тэднийг үүнийг хийхийг шахсан, дайн руу түлхсэн. Зарим жижиг хотуудад цэргийн насны эр хүн ч үлдээгүй. Кремль Украинд украинчуудыг, харин Орост үндэсний цөөнхүүдийг хөнөөж байна. Энэ бол угсаатны цэвэрлэгээ, цэргийн гэмт хэрэг" хэмээн Ц.Элбэгдорж өгүүлжээ.

Г.Бямбасүрэн

Shuud.mn