Ням гарагт Санкт-Петербург хотын нэг кафед бөмбөг дэлбэрэх үеэр Оросын цэрэг дайны сэдвээр бичдэг блогчин Владлен Татарский алагдсан билээ.
Өчигдөр уг хэргийг шалгаж буй мөрдөн байцаагчид 26 настай Дарья Трепова хэмээх эмэгтэйг баривчилжээ.
Түүнийг тэсрэх бөмбөг бүхий баримлыг Татарскийд бэлэглэсэн гэж үзэж байгаа юм байна.
Мөрдөн байцаагчид Треповагийн хайрцагтай баримал бариад кафед ирж буй дүрс бичлэгийг бас нийтэд үзүүлжээ.
Халдлагыг Украины талаас зохион байгуулсныг батлах баримтыг олсноо мөн мэдээлсэн байна.
Харин Киевийн эрх баригчид уг халдлагад хамаагүйгээ мэдэгдээд үүнийг Оросын дотоодын зөрчил тэмцэл гэж тайлбарлажээ.
Дэлбэрэлтийн үеэр Татарский алагдаж, өөр 30 орчим хүн шархадсан байна.
Жинхэнэ нэр нь Максим Фомин болох 40 настай Татарский тухайн өдөр кафед өөрийн дэмжигчидтэй уулзаж байжээ.
Өчигдөр мөрдөн байцаагчид Треповагийн өгсөн мэдүүлгээс зарим хэсгийг нийтэд мэдээлсэн байна.
Түүнээс яагаад баривчлагдсанаа мэдэж байгаа эсэхийг асуухад “Владлен Татарскийн амийг хөнөөсөн хэргийн газарт байсан учраас. Би тэнд дэлбэрсэн баримлыг авчирсан юм” гэж хариулжээ.
Хайрцгийг хэн түүнд өгснийг асуухад “Би энэ талаар дараа хэлж болох уу?” гэж хариулсан байна.
Оросын эрх баригчид энэ хэргийг Украины тусгай албад сөрөг хүчний улс төрч Алексей Навальныйгийн хүмүүстэй хамтран зохион байгуулсан “террорист халдлага” гэж нэрлэжээ.
Мөн халдлагыг Украины нутаг дэвсгэрт төлөвлөснийг батлах баримт олсон, холбоотой бүх хүмүүсийг илрүүлэх ажиллагааг эхлүүлсэн тухай мэдээлсэн байна.
Навальныйгийн байгуулсан Авлигатай Тэмцэх Сангийн тэргүүн Иван Жданов энэ хэрэгт тус байгууллага ямар ч оролцоогүйгээ мэдэгдээд Оросын эрх баригчид дотоодын дайсан бий болгох зорилгоор өөрсдийг нь гүтгэж байна гэж дүгнэжээ.
Хэргийн гол сэжигтэн Дарья Треповаг өчигдөр нөхрийнх нь найзын өмч болох Санкт-Петербургийн орон сууцнаас баривчилсан байна.
Өнгөрсөн онд тэрбээр Украины дайныг эсэргүүцсэн жагсаалд оролцоод хэд хоног саатуулагдаж байжээ.
Халдлага гарсан Нева мөрний эрэг дээрх кафе өмнө нь Оросын хувийн зэвсэгт хүчний Вагнер группийг үүсгэн байгуулагч Евгений Пригожиний өмч байсан гэдэг.
Өчигдөр Пригожин алагдсан Татарскийн араас эмгэнэл илэрхийлсэн видео мэдэгдлийг Украины Бахмут хотоос цацсан юм.
Өчигдөр бас ОХУ-ын ерөнхийлөгч Владимир Путин эр зоригийн одонгоор Татарскийг нөхөн шагнах зарлиг гаргажээ.
Телеграм сошиал платформд хагас сая гаруй дагагчтай Татарский нь Оросын эрх баригчдын Украинд явуулж буй дайныг идэвхтэй дэмжигч байсан юм.
Украины Донецк мужид төрсөн тэрбээр өмнө нь зэвсэгт дээрмийн хэргээр шоронд ял эдэлж байсан бөгөөд өөрийг нь салан тусгаарлагчид шоронгоос чөлөөлсний дараа Кремлийн бодлогыг тууштай дэмжигч болж байжээ.
Эх сурвалж: BBC