Өнгөрсөн сард Нидерландын Гааг хот дахь олон улсын эрүүгийн шүүх Украинаас хүүхдүүдийг Оросын газар нутаг руу албадан нүүлгэсэн дайны гэмт хэрэгтэй холбогдуулан ОХУ-ын ерөнхийлөгч Владимир Путин, тус улсын хүүхдийн эрхийг хамгаалах байгууллагын тэргүүн Мария Львова-Белова нарыг баривчлах шийдвэр гаргасан билээ.
Тэгвэл ар гэрийнхэн нь хүсэлт гаргасан тохиолдолд хүүхдүүдийг Украин руу буцаахад бэлэн байгаагаа Львова-Белова өчигдөр мэдэгджээ.
Дайн эхэлсэн цагаас хойш Оросын эрх баригчид нийтдээ 16,000 гаруй хүүхдийг Украинаас “хулгайлсан” гэж Киевийн засгийн газар үздэг.
Харин Оросын тал дайны аюулаас хүүхдүүдийг хамгаалах зорилгоор ийм ажил зохион байгуулсан, сүүлд ар гэрт нь буцаах төлөвлөгөө байгаа гэж тайлбарладаг байв.
Өчигдөр Москвад болсон хэвлэлийн хурлын үеэр Львова-Белова өнөөдрийг хүртэл хүүхдүүдийг буцааж авах талаар ямар ч хүсэлт Украины талаас хүлээж аваагүй байгаагаа мэдэгджээ.
Тэрбээр хүүхдээ буцааж авах хүсэлтэй эцэг эхчүүд өөрт нь цахим шуудан илгээх хэрэгтэйг энэ үеэр тайлбарласан байна.
Гуравдугаар сарын 29-нөөс хойш буюу сүүлийн нэг долоо хоногийн хугацаанд есөн гэр бүлийн 16 хүүхдийг Украин руу буцаасныг энэ үеэр тэр мэдээлсэн ч нийтдээ хэдэн хүүхэд ОХУ-д байгаа талаар тоо баримт өгөхөөс татгалзжээ.
Ямартай ч дайны улмаас өнчирсөн 380 хүүхдийг Оросын гэр бүлүүд асран халамжилж байгаагаас 22 нь Мариуполь хотын гудамжнаас олдсон болохыг Львова-Белова мэдээлсэн байна.
Бусдад хууран мэхлэгдэж Украин руу буцах гэж байсан өсвөр насны хүүг Беларусийн хил дээрээс буцаасан тохиолдлыг тэр энэ үеэр дурджээ.
Эх сурвалж: AFP
