Бид өмнөх нийтлэлдээ нийслэлээс дахин зам цэвэрлэгээний тусгай зориулалтын автомашин авах нэг тэрбум төгрөгийн тендер зарласан талаар мөн авах гэж байгаа цэвэрлэгээний автомашины Монголд ажиллах чадварын талаар сануулсан.

Энэ удаад мөн л төсвийн мөнгө уйлдаггүй хэмээн сэтгэж 500 саяыг гаргаад шидчихэж. Тодруулбал, Ховд аймгийн дарга нар 500 саяыг салхинд хийсгэж, 20.1 саяар эмээл, мөнгөн аяга, бэлэг дурсгалын зүйл авчээ.

Төсвийн мөнгө уйлдаг “бол-гоё”

Ховд аймгийн Аудитын газраас тус аймгийн Засаг даргын тамгын газрын 2022 оны төсвийн зарцуулалтад хяналт, шинжилгээ хийж дараах зөрчлийг илрүүлжээ. Тухайлбал Засаг даргын нөөц хөрөнгөөс гарын бэлэг бэлтгэх, ресторан зоогийн газарт хооллох, зочид буудалд байрлах төлбөрийг нь төлөх зэргээр төсвийн хөрөнгийг үр ашиггүй зарцуулжээ.

Түүнчлэн Засгийн газрын хэрэг эрхлэх газрын даргын 2022 оны 33-р тушаалаар “Сум багийн хөгжлийг дэмжих, чадавхжуулах арга хэмжээнд зориулсан 500 сая” төгрөгийг үр ашиггүй зарцуулсныг тогтоосон байна. 20.1 сая төгрөгөөр бэлэг дурсгал, бялуу, бэлгийн тор, эмээл, мөнгөн аяга зэрэгт зарцуулсан нь Төрийн хэмнэлтийн хуулийг зөрчсөн бол сайд, дэд сайд, бусад албаны хүмүүсийн томилолт, үйл ажиллагааны зардалд 17.4 сая төгрөгийг тус тус зарцуулсан нь холбогдох хуультай харшилдаж буйг Аудитын байгууллага тогтоожээ.

Харин нутгийн иргэдийн зүгээс анх удаа эмэгтэй Засаг даргатай болоод аймаг сум маань хөгжих нь гэж итгэж байтал бусдаас илүүрхээд байгаа юм бол харагдахгүй байна. Мөнгө цагаан нүд улаан гэдэг нь хэн хүнд адилхан байдаг бололтой хэмээн халаглаж байна.

Үүнээс үзэхэд өнгөрсөн хойно нь ниргэв биш урьдчилж хянадаг, шалгадаг, сануулдаг баймаар байна.

BOLOD.MN